17 წელი გავიდა მას შემდეგ, რაც Google-ის Mountain View-ს კამპუსში, საძიებო სისტემის ხარისხის ყოველკვირეულ შეხვედრას დავესწარი. მაშინ ინჟინრები და მენეჯერები დეტალურად განიხილავდნენ, თუ რატომ არ იძლეოდა კონკრეტული ძიება იდეალურ შედეგს. 2010 წლისთვის ამ შეხვედრებმა Google-ს საძიებო ალგორითმში 550 ცვლილების შეტანისკენ უბიძგა — ეს რიცხვი მაშინ შთამბეჭდავად გვეჩვენებოდა.
დღეს ეს მოგონება შორეულ წარსულს ჰგავს. Google-ის წლევანდელ I/O დეველოპერთა კონფერენციაზე, ძიების მიმართულების ხელმძღვანელმა, ლიზ რეიდმა (Liz Reid), ძველი, ტრადიციული ძებნა ფაქტობრივად წარსულს ჩააბარა. ეს პროცესი ორი წლის წინ დაიწყო, როდესაც Google-მა „AI Overview“ წარადგინა — ხელოვნური ინტელექტის მიერ გენერირებული რეზიუმეები, რომლებიც საძიებო გვერდის თავში, ცნობილი „10 ლურჯი ლინკის“ ზემოთ მოექცა. ახლა კი მომხმარებლები პირდაპირ კომუნიკაციაში შედიან Google-ის Gemini-ის უახლეს ვერსიასთან. თავად ტერმინი „საძიებო მოთხოვნაც“ კი მოძველდა; დღეს ადამიანის შეყვანილი ტექსტი AI-სთან კოლაბორაციის დასაწყისია.
Google-ის ახალი „ჭკვიანი“ საძიებო ველი Gemini-ის მიერ პერსონალიზებული პასუხების შექმნის შეთავაზებაა. კომპანიის წარმომადგენლებს კონფერენციაზე ეცვათ მაისურები წარწერით „Ask Me Anything“ (მკითხე ნებისმიერი რამ). ჩვენი ციფრული ცხოვრება რთულ გარდამავალ ეტაპზეა. AI მართავს ყველა ბიზნეს მოდელს და Google-ს ის ყველა პროდუქტში შეაქვს. მიუხედავად იმისა, რომ საზოგადოებაში არსებობს გარკვეული წინააღმდეგობა და შიში ამ ტექნოლოგიის მიმართ, Google-ისთვის AI ძიება გარდაუვალი რეალობაა.
თავდაპირველად მეც სკეპტიკურად ვუყურებდი AI Overview-ს, თუმცა დღეს უნდა ვაღიარო, რომ გარკვეული ინფორმაციის მოსაძიებლად AI Mode ბევრად ეფექტურია. კომპანიის მონაცემებით, თვეში მილიარდზე მეტი ადამიანი იყენებს AI Mode-ს და ასეთი ძიებების რაოდენობა ყოველკვარტალურად ორმაგდება.
ინტერვიუში ლიზ რეიდს ვკითხე, თუ როგორ განმარტავს ის ახლა „ძიებას“. მან Google-ის მისია გაიხსენა: „გახადო ინფორმაცია არა მხოლოდ ორგანიზებული, არამედ მართლაც სასარგებლო და ხელმისაწვდომი“. თუმცა, ორიგინალური Google-ის წარმატება ღია ინტერნეტზე იყო დაფუძნებული. ახლა Google ყოველდღიურად მილიარდობით ვებგვერდს სკანირებს, რათა მონაცემები საკუთარი პერსონალიზებული პასუხებისთვის გამოიყენოს. ამით კონტენტის შემქმნელები და ვებგვერდები, რომელთა მასალებზეც AI სწავლობს, წაგებულები რჩებიან.
რეიდი არ ეთანხმება მოსაზრებას, რომ AI ძიება ტრადიციულ ინტერნეტს გაანადგურებს. მისი თქმით, უნიკალური რეპორტაჟები და ორიგინალური კონტენტი მაინც იპოვის აუდიტორიას. Gemini-ის შეცდომებზე საუბრისას მან აღიარა, რომ ტექნოლოგია სრულყოფილი არ არის, თუმცა ფაქტობრივი უზუსტობები მნიშვნელოვნად შემცირდა. საბოლოო ჯამში, რაც არ უნდა გვეშინოდეს AI-ს, ჩვენ მას მაინც გამოვიყენებთ, რადგან Google-ში ძიებების საერთო რაოდენობა რეკორდულ ნიშნულზეა.
წყარო: wired.com
