წლების განმავლობაში ინდოეთი მსოფლიოში აპლიკაციების ჩამოტვირთვის ყველაზე დიდი ბაზარი იყო, თუმცა შემოსავლების გენერირების კუთხით ერთ-ერთი ყველაზე რთული რეგიონი. დღეს ეს სურათი იცვლება: ინდოელი მომხმარებლები სულ უფრო მეტს ხარჯავენ AI-ზე, გართობასა და პრემიუმ სერვისებზე.
Sensor Tower-ის მონაცემებით, მიმდინარე წლის მეორე კვარტალში ინდოეთის მობილური აპლიკაციების ბაზარზე მომხმარებელთა დანახარჯებმა რეკორდულ 345 მილიონ დოლარს მიაღწია, რაც წინა წელთან შედარებით 35%-იანი ზრდაა. ზრდა ძირითადად განპირობებულია გენერაციული AI-ით, სტრიმინგითა და პროდუქტიულობის აპლიკაციებით.
ინდოეთში აპლიკაციების შემოსავალი ჩამოტვირთვაზე ბოლო სამნახევარი წლის განმავლობაში ორჯერ გაიზარდა. ექსპერტები ამ ცვლილებას ციფრული გადახდების სისტემების, კერძოდ, Unified Payments Interface-ის (UPI) ფართო დანერგვას უკავშირებენ, რამაც აპლიკაციებში შესყიდვები გაამარტივა. გლობალურ ჭრილში, ინდოეთი აპლიკაციების მონეტიზაციის ტემპით ერთ-ერთი ლიდერია, მაშინ როცა აშშ-ში მსგავსი მაჩვენებელი 3%-ით შემცირდა.
გენერაციული AI სეგმენტში OpenAI-ის ChatGPT და Anthropic-ის Claude დომინირებენ, რომლებიც ინდოეთის AI აპლიკაციების შემოსავლის 83%-ს შეადგენენ. ასევე, მნიშვნელოვანია არასათამაშო აპლიკაციების წილი, რომელიც ბაზრის 68%-ს იკავებს. მიუხედავად იმისა, რომ ინდოეთი ჯერ კიდევ ჩამორჩება აშშ-ს, იაპონიასა და სამხრეთ კორეას ერთ მომხმარებელზე შემოსავლის კუთხით, ბაზრის განვითარების ტრაექტორია გრძელვადიან პერსპექტივაში დიდ პოტენციალს აჩვენებს.
წყარო: techcrunch.com
