გასულ წელს WhatsApp-მა და Apple-მა იტალიაში რამდენიმე ადამიანს, მათ შორის ჟურნალისტებსა და აქტივისტებს, შეატყობინეს, რომ ისინი სამთავრობო spyware-ის სამიზნე გახდნენ. კერძოდ, WhatsApp-მა ხაზი გაუსვა ისრაელურ-ამერიკულ კომპანიას, Paragon Solutions-ს, რომელმაც უზრუნველყო ტექნოლოგია ჰაკერული კამპანიისთვის, რომლის ფარგლებშიც Graphite spyware-ის გამოყენებით მსოფლიოში დაახლოებით 90 ადამიანი დაზარალდა.
ამ შეტყობინებებმა იტალიაში სკანდალი გამოიწვია. მსხვერპლთა ნაწილმა სისხლის სამართლის საჩივრებით მიმართა იტალიის ხელისუფლებას, პროკურატურამ კი გამოძიება დაიწყო. თუმცა, როგორც ირკვევა, Paragon-ი, მიუხედავად წინა დაპირებებისა გამოძიებასთან თანამშრომლობის შესახებ, დღესდღეობით პროცესში არ ერთვება.
Wired Italy-ის ცნობით, იტალიელმა პროკურორებმა ისრაელის მთავრობის მეშვეობით Paragon-ს ინფორმაციის მოთხოვნით ოფიციალურად მიმართეს, მაგრამ საქმის აღძვრიდან ერთი წლის შემდეგ კომპანიას ჯერ არ უპასუხია.
ადრე Paragon-მა იტალიის მთავრობა საჯაროდ გააკრიტიკა და განაცხადა, რომ მათ უარი თქვეს კომპანიის შეთავაზებაზე, ერთობლივად გამოეძიებინათ ჟურნალისტის გატეხვის ფაქტი. კომპანიამ იტალიის ჯაშუშურ სააგენტოებთან (AISE და AISI) კონტრაქტიც კი გააუქმა.
უცნობია, რატომ არ პასუხობს Paragon პროკურატურის მოთხოვნას. შესაძლოა, საქმეში ისრაელის მთავრობა ჩაერია. ისრაელელმა ადამიანის უფლებათა დამცველმა იურისტმა ეიტაი მაკმა აღნიშნა, რომ ისრაელის მთავრობას შეუძლია აიძულოს ადგილობრივი კომპანიები ითანამშრომლონ უცხოურ გამოძიებასთან, "მაგრამ ეს არასდროს მომხდარა."
მთავრობების მიერ გამოყენებული spyware-ების ისტორიაში უკიდურესად იშვიათია, რომ კომპანია საჯაროდ დაუპირისპირდეს თავის ყოფილ კლიენტს. Paragon ცდილობს პოზიციონირდეს როგორც უფრო ეთიკური ალტერნატივა სხვა მწარმოებლებთან (როგორიცაა NSO Group და Intellexa) შედარებით. მიუხედავად ამ პირველი საჯარო სკანდალისა, კომპანიას ახლა აქვს აქტიური კონტრაქტი აშშ-ის საიმიგრაციო და საბაჟო აღსრულების სამსახურთან (ICE), რომელიც Paragon-ის ტექნოლოგიას ტერორიზმისა და ნარკოტრაფიკის წინააღმდეგ ბრძოლისთვის იყენებს.
იტალიის მთავრობა უარყოფს ონლაინ გამოცემა Fanpage-ის ორი ჟურნალისტის გატეხვას, თუმცა მკვლევართა ჯგუფმა Citizen Lab-მა დაადასტურა, რომ ორივე მათგანი Graphite-ის სამიზნე გახდა. დაზარალებულთა შორისაა არასამთავრობო ორგანიზაცია Mediterranea Saving Humans-ის აქტივისტებიც. იტალიელი პროკურორების განცხადებით, ერთ-ერთი ჟურნალისტის მოწყობილობის სასამართლო ექსპერტიზამ დაადასტურა ჰაკერული ჩარევა. საქმეზე გამოძიება კვლავ გრძელდება.
წყარო: techcrunch.com
