ბენგალურუში დაფუძნებულმა food delivery სტარტაპმა Swish-მა ახალ დაფინანსების რაუნდში $38 მილიონი მოიზიდა. 18 თვის კომპანია 10-წუთიანი მიტანის სერვისით ინვესტორების ყურადღებას კვლავაც იპყრობს.
Series B რაუნდს Hara Global და Bain Capital Ventures უძღვებოდნენ, რომელშიც Accel, Stride Ventures და Alteria Capital-იც მონაწილეობდნენ. შედეგად, Swish-ის შეფასება $139 მილიონამდე გაიზარდა, რაც გასული წლის მონაცემებს ორჯერ აღემატება, ხოლო ჯამურმა მოზიდულმა დაფინანსებამ $54 მილიონს მიაღწია.
აღსანიშნავია, რომ ინდოეთში ულტრა-სწრაფი მიტანის ბიზნესის შენარჩუნება საკმაოდ რთულია. ბოლო თვეებში მსხვილმა პლატფორმებმა, როგორიცაა Swiggy, Zepto და Zomato, ოპერაციული სირთულეებისა და მაღალი დანახარჯების გამო მსგავსი ექსპერიმენტები შეამცირეს ან საერთოდ დახურეს.
2024 წელს დაფუძნებული Swish full-stack ბიზნეს მოდელით ოპერირებს — ის თავად ფლობს სამზარეულოებს, მიწოდების ჯაჭვს და მიტანის ქსელს. კომპანია ფოკუსირებულია მჭიდრო, ჰიპერლოკალურ კლასტერებზე დაახლოებით 1-კილომეტრიანი რადიუსით. მათი თქმით, მესამე მხარის რესტორნების საკომისიოზე დამოკიდებულ პლატფორმებთან შედარებით, ეს ბევრად უკეთეს ეკონომიკურ მოდელს უზრუნველყოფს.
სტარტაპი ამჟამად დღეში 20,000-მდე შეკვეთას აწვდის, რაც ოთხი თვის წინანდელ 5,000-იან მაჩვენებელზე მნიშვნელოვნად მეტია. Swish მომხმარებლებს 200-ზე მეტ პროდუქტს სთავაზობს, საშუალო შეკვეთის ღირებულება კი $2-$3-ის ფარგლებშია. კომპანიის თანადამფუძნებლის და აღმასრულებელი დირექტორის, Aniket Shah-ის განცხადებით, მათი ძველი სამზარეულოების კლასტერები უკვე მომგებიანია.
სამომავლოდ, კომპანია ბენგალურუს ფარგლებში, ასევე Delhi-NCR-სა და მუმბაიში გაფართოებას გეგმავს. მიუხედავად ამისა, მოდელი კვლავ მჭიდრო ურბანულ კლასტერებსა და შეკვეთების მაღალ მოცულობაზეა დამოკიდებული, ამიტომ დრო აჩვენებს, რამდენად გაამართლებს ინვესტორთა ენთუზიაზმი გრძელვადიან პერსპექტივაში.
წყარო: techcrunch.com
