X Money, რომელიც ილონ მასკის „ყველაფრის აპლიკაციად“ (everything app) გარდაქმნის სტრატეგიის ნაწილია, აშშ-ში ოფიციალურად ამოქმედდა. პლატფორმა მომხმარებლებს სთავაზობს ციფრულ საფულესა და P2P (peer-to-peer) გადახდების სისტემას, რომელიც ფუნქციურად Venmo-ს ჰგავს. სერვისი ასევე მოიცავს მეტალის Visa ბარათს, რომელზეც მომხმარებელს საკუთარი X-ის მომხმარებლის სახელი შეუძლია დაიტანოს.
პლატფორმის უპირატესობებს შორისაა Apple Wallet-ის მხარდაჭერა და X-ის პლატფორმაზე ფულადი გზავნილების უფასო სისტემა. რაც შეეხება ფინანსურ სარგებელს, X Money გვთავაზობს 6%-მდე წლიურ საპროცენტო განაკვეთს (APY), თუმცა ეს პრივილეგია მხოლოდ Premium Plus-ის აბონენტებისთვისაა ხელმისაწვდომი. სტანდარტული Premium-ის მომხმარებლებს კი „გაზრდილი“ 6%-იანი განაკვეთის მისაღებად გარკვეული თანხის დეპონირება მოუწევთ.
ადრე X Money მხოლოდ დახურული ბეტა-ტესტირების რეჟიმში ფუნქციონირებდა, ახლა კი ის ხელმისაწვდომია აშშ-ში მყოფი X Premium და Premium Plus-ის აბონენტებისთვის. აღსანიშნავია, რომ პროექტის გაშვებას თან ახლდა კრიტიკა სენატორ ელიზაბეტ უორენის მხრიდან, რომელმაც უსაფრთხოების რისკებზე, მომხმარებელთა დაცვასა და ფინანსური სისტემის სტაბილურობაზე გაამახვილა ყურადღება. მიუხედავად ამისა, ილონ მასკი მტკიცედ აგრძელებს თავის ხედვას, რომლის მიხედვითაც, ყველაფერი, რაც ფულთან არის დაკავშირებული, X-ის პლატფორმაზე უნდა იყოს ინტეგრირებული.
წყარო: theverge.com
