Wikimedia Foundation-ის 200-ზე მეტმა თანამშრომელმა ხმა მისცა Communications Workers of America-ს პროფკავშირში გაწევრიანებას. ეს გადაწყვეტილება ორგანიზაციისთვის ისტორიულია და მოდის იმ პერიოდში, როდესაც Wikipedia-ს შემქმნელი ფონდი AI ჩატბოტების მხრიდან მზარდ კონკურენციასა და მოხალისე რედაქტორების რაოდენობის კლებას უპირისპირდება.
სან-ფრანცისკოში დაფუძნებული ფონდი, რომელიც 39 ქვეყანაში დაახლოებით 700 ადამიანს ასაქმებს, ბოლო წლებში მნიშვნელოვნად გაიზარდა. თანამშრომლების თქმით, პროფკავშირის შექმნის მთავარი მოტივაცია არა ხელფასები, არამედ მენეჯმენტის გადაწყვეტილებების მიღების პროცესში გამჭვირვალობის ნაკლებობა და შიდა კომუნიკაციის გაუმჯობესების სურვილია. თანამშრომლები მიიჩნევენ, რომ ორგანიზაციული ბიუროკრატიის ზრდამ მათზე გავლენა მოახდინა და ახლა ისინი ცდილობენ, სტრატეგიულ გადაწყვეტილებებში უფრო აქტიური მონაწილეობა მიიღონ.
Wikimedia Foundation-ის აღმასრულებელმა დირექტორმა, Bernadette Meehan-მა, პროფკავშირის შექმნას „ახალი თავის დასაწყისი“ უწოდა და განაცხადა, რომ მენეჯმენტი მზადაა თანამშრომლებთან კონსტრუქციული დიალოგისთვის. მიუხედავად ამისა, თანამშრომლები სიფრთხილეს იჩენენ, რადგან ფონდმა მოლაპარაკებებისთვის იურიდიული ფირმა Littler Mendelson დაიქირავა, რომელიც ცნობილია პროფკავშირების წინააღმდეგ მუშაობით.
მომავალში პროფკავშირი გეგმავს კოლექტიური ხელშეკრულების გაფორმებას, რომელიც მოიცავს დასაქმებულთა უფლებების დაცვას და სამუშაო პირობების გაუმჯობესებას. ეს ნაბიჯი მიზნად ისახავს ორგანიზაციაში ნდობის აღდგენას და იმ გამოწვევების დაძლევას, რომლებსაც AI ტექნოლოგიების ეპოქაში Wikipedia-ს არსებობა აწყდება.
წყარო: wired.com
