Uber-მა ლონდონში კომერციული რობოტაქსების სერვისის გაშვებით კონკურენტ Waymo-ს გაუსწრო. ავტომობილები იყენებენ ბრიტანული სტარტაპის, Wayve-ის მიერ შემუშავებულ ავტონომიური მართვის ტექნოლოგიას. საწყის ეტაპზე, უსაფრთხოების მიზნით, საჭესთან მძღოლები იქნებიან, თუმცა ისინი ავტომობილს არ მართავენ.
ლონდონელ მომხმარებლებს, რომლებსაც ახალი ტექნოლოგიის გამოცდა სურთ, შეუძლიათ აპლიკაციის პარამეტრებში შესაბამისი უპირატესობა მიუთითონ. UberX, Uber Comfort ან Uber Electric-ის შეკვეთისას, მათ შესაძლოა Wayve-ის ავტონომიური ავტომობილი დახვდეთ. ფლოტი ამჟამად Ford Mustang Mach-E მოდელებით არის დაკომპლექტებული, მომავალში კი Nissan Leaf-იც დაემატება.
Wayve-ის AV2.0 სისტემა ტრადიციული ავტონომიური მართვისგან განსხვავდება. ის არ ეყრდნობა HD რუკებს ან წესებზე დაფუძნებულ ალგორითმებს, არამედ იყენებს ხელოვნურ ინტელექტს, რომელიც სწავლობს გარემოს, აფასებს რისკებს და ადაპტირდება ახალ პირობებთან. აღსანიშნავია, რომ Wayve არ იყენებს Lidar-ის სენსორებს, რაც მას Tesla-ს მიდგომასთან აახლოებს.
Uber-ის სტრატეგია გულისხმობს ჰიბრიდულ ქსელს, სადაც ადამიანის მიერ მართული ავტომობილები და რობოტაქსები ერთად ფუნქციონირებენ. კომპანია გეგმავს მომდევნო წლებში რობოტაქსების მიმართულებით 10 მილიარდ დოლარზე მეტი ინვესტიცია განახორციელოს. მიუხედავად იმისა, რომ Waymo-ც გეგმავს ლონდონში შესვლას, Uber-მა უკვე მოახერხა ბაზარზე პირველობის მოპოვება და სტანდარტების დაწესება.
წყარო: theverge.com
