ხუთშაბათს Apple-მა სარეკორდო კვარტალური შედეგები გამოაქვეყნა. თუმცა, მიმავალმა CEO-მ, Tim Cook-მა, ყურადღება გაამახვილა მეხსიერების ჩიპების მიწოდების პრობლემებზე, რამაც უახლოეს მომავალში შესაძლოა კომპანიის ბიზნესზე უარყოფითი გავლენა იქონიოს.
„Apple ამაყობს ისტორიაში საუკეთესო მარტის კვარტალით, 111.2 მილიარდი დოლარის შემოსავლითა და ორნიშნა ზრდით ყველა გეოგრაფიულ სეგმენტში,“ — განაცხადა Cook-მა. „iPhone 17-ის ხაზზე არსებულმა არაორდინალურმა მოთხოვნამ რეკორდული მაჩვენებლები განაპირობა.“
თუმცა, Cook-ის თქმით, მარტში კომპანიამ მეხსიერების ჩიპებზე გაცილებით მეტი დახარჯა. მიუხედავად იმისა, რომ ხარჯები არსებული მარაგების გაყიდვით დაბალანსდა, ივნისიდან მოსალოდნელია „მეხსიერებაზე ფასების მნიშვნელოვანი ზრდა“, რაც ბიზნესზე დიდ გავლენას მოახდენს.
Cook გულისხმობდა ტენდენციას, რომელსაც ხშირად „RAMageddon“-ს უწოდებენ — AI ინდუსტრიის მიერ მეხსიერების ჩიპების მასობრივი მოხმარება დეფიციტს და ტექნიკაზე ფასების ზრდას იწვევს. რადგან Apple ძირითადად აპარატურული უზრუნველყოფის (hardware) კომპანიაა, ეს მათი ძირითადი პროდუქტებისთვის სერიოზული გამოწვევაა.
ჩიპების დეფიციტი განსაკუთრებით iPhone-ს შეეხო. ვრცელდება ინფორმაცია, რომ RAM-ის ხარჯები გაოთხმაგდა, რაც საგრძნობლად ზრდის წარმოების ღირებულებას და Apple-ის მომავალ CEO-ს, John Ternus-ს, რთულ მდგომარეობაში აყენებს.
ერთ-ერთი სავარაუდო შედეგი iPhone-ზე ფასების ზრდაა. „ამჟამად მიწოდების ჯაჭვში დამატებითი ნაწილების მოსაპოვებლად მოქნილობა შემცირებულია,“ — აღნიშნა Cook-მა.
Ternus-მა, რომელიც აქამდე Apple-ის hardware ინჟინერიის უფროსი ვიცე-პრეზიდენტი იყო, Cook-ს ყველა დროის ერთ-ერთი საუკეთესო ბიზნეს ლიდერი უწოდა და CEO-ს პოზიციის დაკავებას უდიდესი პატივი უწოდა.
1 სექტემბერს პოზიციაზე დასაქმებისას Ternus-ს საკმაოდ რთული სამუშაო ელის, თუმცა მას გარკვეული დროის განმავლობაში შეეძლება დაეყრდნოს Cook-ის გამოცდილებას მიწოდების ჯაჭვის მართვაში, რადგან Tim Cook აღმასრულებელ თავმჯდომარედ რჩება.
წყარო: techcrunch.com
