Bloomberg-ის ცნობით, SpaceX ტეხასში დაგეგმილი Terafab-ის ნახევარგამტარების ქარხნისთვის ელექტროენერგიის მისაწოდებლად ბუნებრივი აირის ელექტროსადგურებს ააშენებს. SpaceX-ის ენერგეტიკისა და მონაცემთა ცენტრების განვითარების ხელმძღვანელმა, რაილი ტრეტელმა განაცხადა, რომ კომპანია პროექტისთვის საკუთარ ენერგორესურსებს გამოიყენებს, რაც ასევე მოიცავს მასშტაბურ სააკუმულატორო სისტემებს.
აღსანიშნავია, რომ პროექტში, რომლის პარტნიორიც Tesla-ა, მზის ენერგიის გამოყენებაზე საუბარი არ არის. მიუხედავად იმისა, რომ ილონ მასკი მზის ენერგიაში დიდ ინვესტიციებს დებს, ბოლო პერიოდში ის აქცენტს ბუნებრივ აირზე აკეთებს. მაგალითად, მემფისში მდებარე xAI-ის მონაცემთა ცენტრები თითქმის სრულად წიაღისეულ საწვავზე მუშაობს. გარდა ამისა, SpaceX გეგმავს მომდევნო სამი წლის განმავლობაში 2.8 მილიარდი დოლარის ღირებულების გაზის ტურბინების შეძენას.
Terafab-ის ქარხანა გრაიმსის ოლქში აშენდება. SpaceX-მა ადგილობრივი ხელისუფლებისგან საგადასახადო შეღავათები მიიღო, სანაცვლოდ კი კომპანია 2030 წლისთვის მინიმუმ 5 მილიარდი დოლარის ინვესტიციას და 2035 წლისთვის 1,800-ზე მეტი სამუშაო ადგილის შექმნას გეგმავს. პროექტის პირველი ფაზის ღირებულება 16.8 მილიარდ დოლარს შეადგენს და ის xAI-ისა და SpaceX-ის მონაცემთა ცენტრებისთვის საჭირო ჩიპების წარმოებაზე იქნება ორიენტირებული.
ხელოვნური ინტელექტის (AI) სექტორის ზრდამ ბუნებრივი აირის ელექტროსადგურებზე მოთხოვნა მკვეთრად გაზარდა, რამაც ამ ტექნოლოგიების ღირებულება 66%-ით აწია. მიუხედავად იმისა, რომ „საკუთარი ენერგიის“ მოდელი პროექტების განვითარებას აჩქარებს, ის გარემოსდაცვით გამოწვევებსაც აჩენს, რის გამოც xAI-ის წინააღმდეგ უკვე მიმდინარეობს სასამართლო დავები გაზის ტურბინების არასათანადო გამოყენების გამო.
წყარო: techcrunch.com
