აშშ-ის ფასიანი ქაღალდებისა და ბირჟების კომისიამ (SEC) ელექტრომობილების (EV) სტარტაპ Faraday Future-ის წინააღმდეგ ოთხწლიანი გამოძიება შეწყვიტა. აღნიშნული გადაწყვეტილება მიღებულ იქნა მიუხედავად იმისა, რომ გასულ წელს კომისიის პერსონალი იურიდიული ზომების გატარებას ითხოვდა.
გამოძიება ძირითადად ფოკუსირებული იყო იმაზე, გააკეთა თუ არა სტარტაპმა „ყალბი და შეცდომაში შემყვანი განცხადებები“ 2021 წელს, როდესაც ის SPAC გარიგების გზით საჯარო კომპანია გახდა. გარდა ამისა, SEC იკვლევდა ინფორმაციას 2023 წელს პირველი ელექტრომობილების გაყიდვების შესაძლო ფალსიფიკაციის შესახებ.
2025 წლის ივლისში Faraday Future-მა და მისმა დამფუძნებელმა, ჯია იუეტინგმა (Jia Yueting) SEC-ისგან მიიღეს ე.წ. Wells Notices, რაც საჯარიმო სანქციების დაწყების წინაპირობაა. თუმცა, საქმის მოულოდნელი დახურვის შემდეგ, ჯიამ განაცხადა: „ახლა შეგვიძლია მთელი ენერგია სტრატეგიის განხორციელებას დავუთმოთ. გასული ხუთი წლის განმავლობაში დიდი დროის, ძალისხმევისა და ფინანსების დახარჯვა მოგვიწია გამოძიებასთან თანამშრომლობისთვის.“
კომპანიის ფონი და გამოწვევები
Faraday Future 2014 წელს კალიფორნიაში დაფუძნდა და მალევე მიიქცია ყურადღება, როგორც პოტენციურმა „Tesla killer“-მა. თუმცა, მიუხედავად Tesla-დან და Apple-დან გადმობირებული ტალანტებისა და ჩინური კონგლომერატის, Evergrande-ის ინვესტიციისა, კომპანია მუდმივ ფინანსურ კრიზისში იყო.
2021 წელს ბირჟაზე გასვლისა და 1 მილიარდი დოლარის მოზიდვის შემდეგ, ახლადდანიშნულმა დირექტორთა საბჭომ აღმოაჩინა, რომ ჯია კვლავ ფარულად აკონტროლებდა ოპერაციებს. ასევე გამოიკვეთა ინტერესთა კონფლიქტის შემცველი ფინანსური ტრანზაქციები. სწორედ ამ შიდა მოკვლევამ დაუდო საფუძველი SEC-ის და შემდგომში ამერიკის იუსტიციის დეპარტამენტის (DOJ) დაინტერესებას.
დღესდღეობით, Faraday Future კვლავ ცდილობს თავისი ძვირადღირებული SUV-ების, FF91-ის გაყიდვას და პარალელურად ჩინეთიდან უფრო ხელმისაწვდომი ჰიბრიდული და ელექტრო მოდელების იმპორტს იწყებს. მიუხედავად ამისა, კომპანიის ფინანსური მდგომარეობა კვლავ მძიმეა — Faraday Future-მა უკვე მიიღო გაფრთხილება Nasdaq-ისგან აქციების ფასის $1-იან ზღვარს ქვემოთ ვარდნის გამო, რამაც შესაძლოა კომპანიის ბირჟიდან დელისტირება გამოიწვიოს.
წყარო: techcrunch.com
