AI-ის მეცნიერი, ანტრეპრენიორი და ინვესტორი, რანა ელ კალიუბი (Rana el Kaliouby) შიშობს, რომ AI ტექნოლოგიურ ინდუსტრიაში შესაძლოა მორიგ "ბიჭების კლუბად" იქცეს. ოსტინში გამართულ SXSW კონფერენციაზე, მან აღნიშნა, რომ სფეროში მრავალფეროვნების (diversity) ნაკლებობამ შესაძლოა ქალებისთვის ტექნოლოგიებში ეკონომიკური უთანასწორობა გამოიწვიოს, რასაც შემდგომი გართულებები მოჰყვება.
"ვფიქრობ, დღეს AI ბიჭების კლუბია. მიმაჩნია, რომ მრავალფეროვნება ამჟამად არცთუ ისე პოპულარული სასაუბრო თემაა, მაგრამ ვთვლი, რომ ეს ძალიან მნიშვნელოვანია, რადგან AI წარმოუდგენელ ეკონომიკურ შესაძლებლობებს ქმნის," - განაცხადა ელ კალიუბიმ სცენაზე, როდესაც ჰკითხეს, იყო თუ არა მითი AI-ის "ბიჭების კლუბად" აღქმა. (ინტერვიუერმა ამის სადემონსტრაციოდ TechCrunch-ის რამდენიმე სათაური აჩვენა, სადაც ასახული იყო AI startup-ები მამაკაცი დამფუძნებლებით).
ელ კალიუბიმ, რომელმაც თავისი ემოციების ამომცნობი პროგრამული უზრუნველყოფის კომპანია Affectiva 2021 წელს გაყიდა და ახლა Blue Tulip Ventures-ის თანადამფუძნებელი და გენერალური პარტნიორია, აღნიშნა, რომ მისი ფირმის ოთხი ინვესტიციიდან სამი ისეთ startup-ებში ხორციელდება, რომელთა CEO-ები ქალები არიან.
"მე 'მხოლოდ' ქალებში არ ვდებ ინვესტიციას," - განმარტა მან. "მაგრამ ნამდვილად ვცდილობ, მოვძებნო ეს ქალი დამფუძნებლები და მხარი დავუჭირო მათ, თუ არა ფინანსურად, სხვა გზებით მაინც, რადგან ისინი ვერ იღებენ იმ შესაძლებლობებს, რაც უნდა ჰქონდეთ და სჭირდებათ."
"თუ ქალები გარიყულნი დარჩებიან — რადგან ისინი არ აფუძნებენ ამ კომპანიებს, ვერ იღებენ დაფინანსებას და თავადაც არ ახორციელებენ ინვესტიციებს იმ ფონდებში, რომლებიც ამ კომპანიებს აფინანსებენ — ხუთი ან ათი წლის შემდეგ უკან მოვიხედავთ და დავინახავთ, რომ ეკონომიკური უფსკრული საგრძნობლად გავზარდეთ. ეს ნამდვილად მაშფოთებს," - აღნიშნა ელ კალიუბიმ.
მისი მინიშნება მრავალფეროვნების თემის ამჟამინდელ "არაპოპულარობაზე" უკავშირდება აშშ-ის ადმინისტრაციის მიერ მრავალფეროვნების, თანასწორობისა და ინკლუზიურობის (DEI) პროგრამების შეჩერების ტენდენციას, რაც ტექნოლოგიურ ინდუსტრიაზეც აისახა. ეს ცვლილებები არა მხოლოდ იმაზე მოქმედებს, თუ როგორ ქირაობენ ტექნოლოგიური კომპანიები კადრებს, არამედ იმაზეც, თუ როგორ ვითარდება მათი პროდუქტები. მაგალითად, AI-ს სფეროში კომპანიებმა შესაძლოა ზეწოლა იგრძნონ, რომ თავიანთი მოდელების შედეგები სამთავრობო პრიორიტეტებს შეუსაბამონ.
ელ კალიუბის თქმით, მრავალფეროვნების ნაკლებობა მხოლოდ პოტენციურ ეკონომიკურ უთანასწორობას არ ეხება — საქმე ასევე საბოლოო შედეგშია.
"ვფიქრობ, ძალიან საინტერესო დროში ვცხოვრობთ. მაგრამ ასევე მტკიცედ მწამს, რომ თუ არ ჩავერევით, თუ ხმამაღლა არ დავიცავთ იმას, რაც ჩვენთვის მნიშვნელოვანია — როგორიცაა ეთიკა, აზროვნებისა და პერსპექტივების მრავალფეროვნება და ადამიანზე ორიენტირებული მიდგომის პრიორიტეტულობა — საბოლოო შედეგი შესაძლოა არცთუ ისე სახარბიელო აღმოჩნდეს," - დასძინა მან. "ამიტომ მიმაჩნია, რომ ახლა გადამწყვეტი მომენტია, გამოვიყენოთ ჩვენი ხმა და ლიდერობა იმის ფორმირებისთვის, თუ საით მიდის ეს სფერო."
წყარო: techcrunch.com
