ახალ კომპიუტერებზე მოთხოვნა მნიშვნელოვნად შემცირდა, რაც გამოწვეულია კომპონენტების ფასების ხანგრძლივი ზრდით. Counterpoint Research-ის მონაცემებით, 2026 წლის მესამე კვარტალში გლობალური PC მიწოდება წლიურ ჭრილში 21 პროცენტით დაეცა, რაც ემთხვევა IDC-სა და Omdia-ს ანგარიშებს. აღსანიშნავია, რომ იმავე პერიოდში სმარტფონების მიწოდებამაც 14-წლიან მინიმუმს მიაღწია.
Counterpoint-ის ანალიტიკოსები ვარდნას კომპონენტების გაძვირებას უკავშირებენ. 2026 წლის მეორე კვარტალამდე PC-ების ბაზარი ორ წელზე მეტი ხნის განმავლობაში სტაბილურად იზრდებოდა. თუმცა, ბოლო თვეებში RAM-ის, SSD-ებისა და Intel-ის, AMD-სა და Qualcomm-ის ჩიპების ფასების ზრდამ გავლენა მოახდინა როგორც MacBook-ებზე, ისე სხვა მოწყობილობებზე. Counterpoint-ის უფროსი ანალიტიკოსის, მინსუ კანგის თქმით, კომპანიები ცდილობენ პრიორიტეტი მიანიჭონ ისეთ კონფიგურაციებს, რომლებიც უკეთ უმკლავდება ინფლაციას, რაც ფასზე მგრძნობიარე მომხმარებლებისთვის არჩევანს ამცირებს. ზოგიერთი მწარმოებელი ხარჯების შესამცირებლად ძველ ტექნოლოგიებსაც კი უბრუნდება, როგორიცაა DDR4 RAM და 4GB GPU.
ანგარიშის მიხედვით, ვარდნას ისიც განაპირობებს, რომ 2025 წლის მესამე კვარტალში მოთხოვნა ხელოვნურად იყო გაზრდილი Windows 10-ის მხარდაჭერის ვადის ამოწურვისა და ტარიფებთან დაკავშირებული მარაგების შევსების გამო. Counterpoint-ის ასოცირებული დირექტორი დევიდ ნარანხო აცხადებს, რომ ბაზრის აღდგენა უახლოეს მომავალში მოსალოდნელი არ არის: 2026 წლის მეოთხე კვარტალში მიწოდების 27-პროცენტიანი ვარდნაა მოსალოდნელი, ხოლო 2027 წელს ბაზარი სტაგნაციას შეინარჩუნებს.
წყარო: theverge.com
