ინდურმა სტარტაპმა Ultrahuman-მა, რომელიც ცნობილია თავისი ჭკვიანი ბეჭდებით, 70 მილიონი დოლარის დაფინანსება მოიზიდა. რაუნდში მონაწილეობა მიიღო Qualcomm-ის საინვესტიციო ფრთამაც. კომპანიის მიზანია, გასცდეს ჯანმრთელობისა და ძილის მონიტორინგის ფარგლებს და შექმნას მოწყობილობა, რომელიც თავად შეძლებს პროგრამული უზრუნველყოფის გაშვებას, AI-ინტერაქციებსა და გეიმინგს.
ბენგალურუში დაფუძნებული სტარტაპის საბაზრო ღირებულება 365 მილიონ დოლარამდე გაიზარდა, რაც 2023 წლის მაჩვენებელს სამჯერ აღემატება. ინვესტორებს შორის არიან Labcorp, Alpha Wave, Blume Ventures და სხვები. Ultrahuman-ის დამფუძნებლისა და CEO-ს, მოჰიტ კუმარის თქმით, კომპანია Qualcomm-თან ერთად მუშაობს ახალ ჩიპებზე, რაც ბეჭდებს მეტ გამოთვლით სიმძლავრეს მისცემს და შეამცირებს დამოკიდებულებას სმარტფონებსა და ქლაუდზე.
Ultrahuman-ის ხედვით, ბეჭედი უნდა იქცეს პერსონალურ კომპიუტერად, რომელზეც დეველოპერებს საკუთარი აპლიკაციების შექმნა შეეძლებათ. კომპანია უკვე გეგმავს პროგრამულ განახლებებს, რომლებიც არსებულ მოდელებს (Ring Air და Ring Pro) გეიმინგ კონტროლერებად და AI-ინტერფეისებად აქცევს. განსხვავებით სმარტ საათებისგან, ბეჭედი მომხმარებლის თითზე ფიქსირდება, რაც მას უფრო ზუსტ სამანიპულაციო და ბიომეტრიულ ინსტრუმენტად აქცევს.
ამჟამად Ultrahuman-ის წლიური შემოსავლის მაჩვენებელი 140 მილიონ დოლარს შეადგენს და კომპანიას 800 000-ზე მეტი ბეჭედი აქვს გაყიდული. მიუხედავად იმისა, რომ აშშ-ის ბაზარზე პატენტებთან დაკავშირებული დავების გამო გარკვეული შეფერხებები იყო, კომპანია აქტიურად აფართოებს თავის გავლენას და გეგმავს IPO-ს 2028 წლისთვის, მას შემდეგ, რაც სტაბილურ მომგებიანობას დაამტკიცებს.
წყარო: techcrunch.com
