PHP-ის ახალი მოწყვლადობების აღმოჩენის შემდეგ, კიბერუსაფრთხოების გუნდები და ვებ ადმინისტრატორები საგანგებო რეჟიმში მუშაობენ. Cloudflare-ის მონაცემებით, მოწყვლადობების გასაჯაროებიდან რამდენიმე საათში ჰაკერებმა მილიონობით საეჭვო შეტევა განახორციელეს, რაც ადასტურებს, რომ AI ინსტრუმენტები თავდამსხმელებს პროცესის დაჩქარებაში ეხმარება.
მიუხედავად იმისა, რომ PHP Foundation-ის ცნობით, მასშტაბური კიბერშეტევები არ დაფიქსირებულა, ეს შემთხვევა მნიშვნელოვან ტენდენციას უსვამს ხაზს: ხელოვნური ინტელექტი მკვლევრებს ეხმარება ისეთი ხარვეზების პრაქტიკულ ექსპლუატაციაში, რომლებიც წლების განმავლობაში ცნობილი იყო, თუმცა მათი გამოყენება შეუძლებლად მიიჩნეოდა. Wiz-ის მკვლევრის, საგი ცადიკის თქმით, მოწყვლადობა PHP-ის გუნდისთვის წლებია ცნობილია, თუმცა რთული სტრუქტურის გამო მისი გამოყენება ადამიანისთვის პრაქტიკულად შეუძლებელი იყო.
ექსპერტები აღნიშნავენ, რომ AI არ ქმნის ახალ საფრთხეებს, არამედ აძლიერებს არსებულ დინამიკას. Hunter Strategy-ის ვიცე-პრეზიდენტი ჯეიკ უილიამსი მიიჩნევს, რომ მსგავსი ტიპის ხანგრძლივი მოწყვლადობების რაოდენობა გაიზრდება, თუმცა მათი მასშტაბი შეზღუდულია, რადგან PHP-ის მსგავსი ფართო ზემოქმედების მქონე ინსტრუმენტები ცოტაა.
მიუხედავად შიშისა, უსაფრთხოების მკვლევარი ნილს პროვოსი სიმშვიდისკენ მოუწოდებს. მისი თქმით, AI-ის გამოყენებით რთული ხარვეზების აღმოჩენა კვლავ მოითხოვს მაღალკვალიფიციურ ადამიანურ რესურსს და მარტივი მოთხოვნებით სისტემების გატეხვა ჯერჯერობით შეუძლებელია.
წყარო: wired.com
