ნიუ-იორკის შტატი ხელოვნური ინტელექტის (AI) უსაფრთხოების ერთ-ერთ ყველაზე მნიშვნელოვან კანონს ნერგავს. სამშაბათს შტატმა ოფიციალური სარეგისტრაციო პორტალი გახსნა, რომლის მეშვეობითაც ისეთი მსხვილი AI დეველოპერები, როგორებიც არიან Anthropic და OpenAI, ვალდებულნი იქნებიან დარეგისტრირდნენ 2027 წლის 1 იანვრამდე.
RAISE Act-ის სახელით ცნობილი კანონი ავალდებულებს მსხვილ კომპანიებს, რომელთა წლიური შემოსავალი 500 მილიონ დოლარს აღემატება, გამოაქვეყნონ უსაფრთხოების ჩარჩოები, 72 საათის განმავლობაში შეატყობინონ კრიტიკული ინციდენტების შესახებ და წარადგინონ მოდელის გამჭვირვალობის ანგარიშები.
კანონის აღსრულებას ციფრული ინოვაციების, მმართველობის, მთლიანობისა და ნდობის ოფისი (DIGIT) უზრუნველყოფს. დარღვევის შემთხვევაში ჯარიმებმა შესაძლოა 1 მილიონი დოლარი, ხოლო განმეორებითი დარღვევისას 3 მილიონი დოლარი შეადგინოს. შტატს ასევე აქვს უფლება, სამართლებრივი ზომები მიიღოს იმ კომპანიების წინააღმდეგ, რომლებიც პორტალზე რეგისტრაციას თავს აარიდებენ.
გუბერნატორმა ქეთი ჰოკულმა ასევე გახსნა ნიუ-იორკის AI პასუხისმგებლობისა და კვლევის ცენტრი, რომელიც ბინგჰემტონის უნივერსიტეტში განთავსდება. ცენტრი დამოუკიდებლად შეაფასებს მოწინავე AI სისტემების უსაფრთხოებას და DIGIT-თან ერთად განიხილავს კომპანიების მიერ წარდგენილ უსაფრთხოების სტრატეგიებს.
ნიუ-იორკი არ არის ერთადერთი შტატი, რომელიც მსგავს ზომებს მიმართავს. კალიფორნიასა და ილინოისში უკვე მიღებულია მსგავსი კანონმდებლობები, რომლებიც AI ლაბორატორიებს უსაფრთხოების ჩარჩოების დანერგვას, ინციდენტების შესახებ ანგარიშგებას და დამოუკიდებელ აუდიტს ავალდებულებს.
წყარო: techcrunch.com
