Microsoft-მა სამწლიანი ხელშეკრულება გააფორმა ინდურ სტარტაპ Alt Carbon-თან, რომლის ფარგლებშიც ტექნოლოგიური გიგანტი 37 000 მეტრულ ტონამდე ნახშირბადის ემისიების შემცირების კრედიტს შეიძენს. ეს არის Microsoft-ის პირველი გარიგება აზიაში, რომელიც „გაძლიერებული ქანების გამოფიტვის“ (enhanced rock weathering) ტექნოლოგიას ეფუძნება.
შეთანხმების თანახმად, Alt Carbon 2029 წლამდე 36 920 ტონა ნახშირორჟანგის შთანთქმის კრედიტს მიაწვდის. პროექტი გულისხმობს დაქუცმაცებული ბაზალტის გაფანტვას სასოფლო-სამეურნეო მიწებზე, რაც აჩქარებს ბუნებრივ ქიმიურ რეაქციებს და ხელს უწყობს ნახშირორჟანგის სტაბილურ ბიკარბონატებად გარდაქმნას.
Alt Carbon-ის თანადამფუძნებლის, სპარშ აგარვალის თქმით, Microsoft-თან მოლაპარაკებები ერთ წელზე მეტხანს გაგრძელდა და მოიცავდა მკაცრ სამეცნიერო შემოწმებასა და მონიტორინგის გაფართოებულ პროტოკოლებს. ეს გარიგება ხაზს უსვამს განვითარებადი ბაზრების მზარდ როლს ნახშირბადის მოცილების გლობალურ ბაზარზე, სადაც სანდო და ვერიფიცირებული მიმწოდებლების დეფიციტია.
ბენგალურუში დაფუძნებული სტარტაპი, რომელმაც გასულ წელს 12 მილიონი დოლარის ინვესტიცია მოიზიდა, ამჟამად 35 000-ზე მეტ ფერმერთან თანამშრომლობს. კომპანია გეგმავს თავისი საქმიანობის მასშტაბების ხუთჯერ გაზრდას მომდევნო ოთხ-ხუთ წელიწადში, რადგან მაღალი ხარისხის ნახშირბადის კრედიტებზე მოთხოვნა სტაბილურად იზრდება.
წყარო: techcrunch.com
