მიუხედავად გავრცელებული მოსაზრებისა, რომ Copilot-ს რეალურად არავინ იყენებს, Microsoft-მა ოთხშაბათს განაცხადა, რომ M365-ის აპლიკაციებში (Word, Excel, Outlook) ინტეგრირებული AI ინსტრუმენტის მომხმარებელთა ბაზა და ჩართულობა იზრდება.
კომპანიის კვარტალური ფინანსური ანგარიშის წარდგენისას, Microsoft-ის CEO-მ, Satya Nadella-მ აღნიშნა, რომ M365 Copilot-ს უკვე 20 მილიონი ფასიანი კორპორატიული ლიცენზია (seat) აქვს.
მისი თქმით, ოთხჯერ გაიზარდა იმ კომპანიების რაოდენობა, რომლებიც 50,000-ზე მეტ ლიცენზიას ყიდულობენ. მაგალითად, Bayer, Johnson & Johnson, Mercedes და Roche 90,000-ზე მეტ ადგილს ფლობენ. Nadella-მ ასევე გამოყო Accenture-თან ამ კვირაში გაფორმებული გარიგება 740,000-ზე მეტ ლიცენზიაზე, რაც Copilot-ის ისტორიაში ყველაზე დიდ წარმატებად შეფასდა.
Nadella ხაზს უსვამს, რომ ადამიანები Copilot-ს ისევე ხშირად იყენებენ, როგორც ელექტრონულ ფოსტას. „ერთ მომხმარებელზე Copilot-ის მოთხოვნები კვარტალურად 20%-ით გაიზარდა. ყოველკვირეული ჩართულობა უკვე Outlook-ის დონეზეა, რაც ყოველდღიური, ინტენსიური მოხმარების ჩვევაზე მიუთითებს“, — აღნიშნა მან.
მან ასევე დააზუსტა, რომ Copilot არ არის დამოკიდებული მხოლოდ ერთ მოდელზე, როგორიცაა OpenAI. მომხმარებლებს ჩატში ავტომატურად აქვთ წვდომა სხვადასხვა მოდელზე ინტელექტუალური მარშრუტიზაციის (intelligent auto-routing) გამოყენებით, რაც ოპტიმალური პასუხების გენერირების საშუალებას იძლევა. მაგალითად, Microsoft 365 ასევე მხარს უჭერს Anthropic-ის Claude-ს.
Morgan Stanley-ს წარმომადგენელმა, Keith Weiss-მა ფინანსური ანგარიშის განხილვისას აღნიშნა, რომ Microsoft 365 Copilot-ის მაჩვენებლები „ძალიან შთამბეჭდავია და უსწრებს მოლოდინების უმეტესობას“.
მოხმარების ზრდას განსაკუთრებით უწყობს ხელს Agent mode, რომელიც წინა კვირიდან Word-ის, Excel-ისა და PowerPoint-ის სტანდარტულ ფუნქციად იქცა. ის Copilot-ს აძლევს შესაძლებლობას, უშუალოდ დოკუმენტებში შეასრულოს მრავალსაფეხურიანი მოქმედებები. „ახლა თქვენ გაქვთ დავალებების დელეგირების და შესრულების სრულიად ახალი გზა Copilot-ის დახმარებით“, — განაცხადა Nadella-მ.
წყარო: techcrunch.com
