Meta-მ ოფიციალურად დააანონსა სმარტ-სათვალეების ახალი ხაზი, სახელწოდებით Meta Glasses, რომლის საწყისი ფასი 299 დოლარია. პროექტი EssilorLuxottica-სთან პარტნიორობით განხორციელდა, თუმცა, კომპანიის წინა მოდელებისგან განსხვავებით, ახალ პროდუქტს Ray-Ban-ის ან Oakley-ს ბრენდინგი არ გააჩნია.
Counterpoint Research-ის მონაცემებით, Meta და EssilorLuxottica ამ სფეროში ბაზრის 80%-ზე მეტს აკონტროლებენ. მიუხედავად იმისა, რომ ახალ სათვალეებს ეკრანი არ აქვს, ისინი აღჭურვილია კამერითა და პერსონალური დინამიკებით. მოწყობილობას აქვს სპეციალური ღილაკი, რომელიც Meta AI ასისტენტს ააქტიურებს, თუმცა მომხმარებელს მისი ფუნქციის მორგებაც შეუძლია.
ტექნიკური მახასიათებლების მიხედვით, სათვალეების ელემენტი 8 საათზე მეტხანს ძლებს, ხოლო დამტენი ქეისი დამატებით 40 საათამდე მუშაობის რესურსს იძლევა. სერია მოიცავს სამ მოდელს: „Meta Adventurer“, „Meta Fury“ და Kylie Jenner-თან თანამშრომლობით შექმნილ „Meta Glasses by Kylie“-ს.
Meta AI ასისტენტი მომხმარებელს დაეხმარება როგორც ყოველდღიური ამოცანების მართვაში, ისე ინფორმაციის მიღებაში. უახლოეს მომავალში დაემატება „ფეხით მოსიარულეთა ნავიგაციის“ ფუნქცია და 14 ახალი ენა რეალურ დროში თარგმნისთვის, მათ შორის იაპონური, ჩინური (მანდარინი), ჰინდი და კორეული. ეს ნაბიჯი Meta-ს მხრიდან სმარტ-მოწყობილობების ბაზარზე პოზიციების გამყარების კიდევ ერთი მცდელობაა, განსაკუთრებით მას შემდეგ, რაც კონკურენტმა Snap-მა საკუთარი, გაცილებით ძვირადღირებული Specs-ი წარადგინა.
წყარო: techcrunch.com
