ელექტრო საჰაერო ტაქსების მწარმოებელმა კომპანიამ, Joby Aviation-მა, 500 მილიონი დოლარის ღირებულების გარიგება დადო Resonant Sciences-ის შესაძენად. ეს ნაბიჯი კომპანიის სტრატეგიის ნაწილია, რომელიც თავდაცვის სექტორში გაფართოებას ისახავს მიზნად.
ოჰაიოში დაფუძნებული Resonant Sciences, რომელიც რადიოსიხშირული და სენსორული სისტემების შემუშავებაზეა სპეციალიზებული, Joby-ის შემადგენლობაში ახალ თავდაცვით განყოფილებად ჩამოყალიბდება. მას კომპანიის თანადამფუძნებელი და CEO, J. Micah North უხელმძღვანელებს. ახალი დივიზია გააერთიანებს Joby-ის ყველა თავდაცვით პროექტს, მათ შორის წყალბადზე მომუშავე ელექტრო თვითმფრინავებისა და ავტონომიური ტექნოლოგიების განვითარებას.
ეს სტრატეგიული ნაბიჯი Joby Aviation-ს საშუალებას მისცემს, ძირითადი რესურსები მიმართოს საკუთარი ელექტრო საჰაერო ტაქსების სერტიფიცირებისა და წარმოებისკენ. Resonant Sciences-ის შეძენა კომპანიას უზრუნველყოფს სტაბილური შემოსავლით — გასული 12 თვის განმავლობაში კომპანიამ 100 მილიონი დოლარის შემოსავალი დააფიქსირა, ასევე წვდომა აქვს აშშ-ის მთავრობის გასაიდუმლოებულ პროგრამებზე.
eVTOL ტექნოლოგიების განვითარება და მასობრივი წარმოება კაპიტალტევადი და ხანგრძლივი პროცესია. Joby-მ, რომელიც 2021 წელს გახდა საჯარო კომპანია, ინვესტორების ნდობის შესანარჩუნებლად შემოსავლის ალტერნატიული წყაროების ძიება დაიწყო. მსგავსი სტრატეგიით, გასულ წელს კომპანიამ Blade Air Mobility-ის ვერტმფრენების სერვისი შეიძინა, რამაც მას ნიუ-იორკის ბაზარზე ინფრასტრუქტურული უპირატესობა და მყისიერი ფინანსური შედეგები მოუტანა.
წყარო: techcrunch.com
