ტრადიციულ საწარმოებში ავტომატიზაცია ხშირად მოუქნელია: რობოტები და დანადგარები კონკრეტულ დავალებაზეა მორგებული. საწარმოო ხაზის შეცვლა კი ხშირად კვირებს ან თვეებს მოითხოვს. სან-ფრანცისკოში დაფუძნებული სტარტაპი Industrial Next ამ პრობლემის გადაჭრას ცდილობს.
კომპანია ქმნის AI-ზე დაფუძნებულ, ავტონომიურ რობოტულ სადგურებს, რომლებიც იყენებენ საკუთარ ფუნდამენტურ მოდელებს მხედველობის, დავალების კონტექსტისა და მოძრაობის სინქრონიზაციისთვის. ეს ტექნოლოგია მწარმოებლებს საშუალებას აძლევს, საწარმოო ხაზი ტრადიციული პროგრამირების გარეშე, სულ რამდენიმე წუთში გადააწყონ. სტარტაპმა უკვე დააანონსა პარტნიორობა BMW Group Technology Office-თან, რათა შეაფასონ მათი რობოტების შესაძლებლობები წარმოების პროცესში.
Industrial Next 2021 წელს Tesla-ს ყოფილმა ინჟინრებმა, ლუკას პანკაუმ და ალენ პანმა დააარსეს. მათი თქმით, ინდუსტრიული ტექნოლოგიები ათწლეულებით ჩამორჩება თანამედროვე პროგრამულ უზრუნველყოფას. „ჩვენ შეგვიძლია მანქანის დიზაინის შესაქმნელად AI გამოვიყენოთ, მაგრამ რობოტის დაპროგრამება კვლავ 1980-იანი წლების მეთოდებით გვიწევს“, — აღნიშნავს პანკაუ.
სტარტაპის მთავარი ინოვაცია მაღალი სიზუსტის სიმულაციურ გარემოშია, სადაც რობოტები სწავლობენ ფიზიკურ მანიპულაციებს. ეს მათ საშუალებას აძლევს, შეასრულონ ისეთი დელიკატური სამუშაოები, როგორიცაა მცირე ზომის კაბელების შეერთება ან დამცავი ფირის მოცილება, რაც აქამდე მხოლოდ ადამიანის ხელით იყო შესაძლებელი. კომპანიის გრძელვადიანი მიზანია სრულად ავტომატიზებული საწარმოო ხაზების შექმნა, სადაც ავტომობილის აწყობა ადამიანის ჩარევის გარეშე იქნება შესაძლებელი.
წყარო: techcrunch.com
