Google-მა სამშაბათს, Android Show: I/O Edition 2026 ღონისძიებაზე Gboard-ისთვის AI-ზე დაფუძნებული ხმოვანი კარნახის ახალი ფუნქცია, Rambler დააანონსა. ეს სიახლე კომპანიას პირდაპირ კონკურენციაში აყენებს Wispr Flow-სა და Typeless-თან — AI კარნახის აპლიკაციებთან, რომლებმაც ბოლო წლებში დესკტოპსა და მობაილზე პოპულარობა მოიპოვეს, თუმცა Android-ზე მყარი პოზიციების დამკვიდრება ჯერ ვერ შეძლეს.
სხვა მსგავსი აპლიკაციების მსგავსად, Rambler შლის ზედმეტ, პარაზიტ სიტყვებს და ასევე აღიქვამს წინადადების შუაში შეტანილ შესწორებებს.
Google-ის განცხადებით, ისინი იყენებენ Gemini-ზე დაფუძნებულ მრავალენოვან მოდელებს, რომლებიც ე.წ. code switching-ს უჭერენ მხარს. ეს ნიშნავს, რომ მომხმარებლებს შეუძლიათ საუბრის პროცესში ენები შეცვალონ — მაგალითად, ინგლისურიდან ჰინდიზე გადავიდნენ — და Rambler კონტექსტის დაკარგვის გარეშე გააგრძელებს მუშაობას. ეს ფუნქცია ბევრი მრავალენოვანი მომხმარებლისთვის კრიტიკულად მნიშვნელოვანია.
Gboard-ის მომხმარებლები ნათლად დაინახავენ, როდის არის Rambler ფუნქცია ჩართული. აპლიკაცია არ ინახავს ხმოვან ჩანაწერებს და აუდიოს მხოლოდ ტრანსკრიფციისთვის იყენებს. მონაცემთა კონფიდენციალურობასთან დაკავშირებით, Google-მა აღნიშნა, რომ იყენებს მოწყობილობასა და cloud-ზე დაფუძნებული დამუშავების კომბინაციას, რაც უზრუნველყოფს უსაფრთხოების მაღალ დონეს.
ბოლო წლებში ბევრი ახალი სტარტაპი გამოჩნდა (Wispr Flow, Willow, Superwhisper და ა.შ.), თუმცა მათი უმეტესობა ძირითადად დესკტოპსა და iOS-ზე ფოკუსირდებოდა. Rambler პირდაპირი პასუხია ამ დანაკლისზე Android-ის ეკოსისტემაში. ფუნქცია თავდაპირველად Samsung Galaxy-სა და Google Pixel-ის ტელეფონებზე იქნება ხელმისაწვდომი. მთავარი უპირატესობა დისტრიბუციაა: Gboard არის სტანდარტული კლავიატურა Android მომხმარებლების უმეტესობისთვის, რაც ნიშნავს, რომ Rambler ავტომატურად ასობით მილიონი ადამიანისთვის იქნება ხელმისაწვდომი.
კარნახის სტარტაპებისთვის მთავარი კითხვა ახლა უკვე ის აღარ არის, შეუძლიათ თუ არა კარგი პროდუქტის შექმნა — მთავარია, შექმნან იმდენად კარგი ალტერნატივა, რომ მომხმარებლებმა მისი გადმოწერა დამოუკიდებლად მოისურვონ.
წყარო: techcrunch.com
