General Motors-მა მიაღწია შეთანხმებას კალიფორნიის გენერალური პროკურორის, Rob Bonta-ს ხელმძღვანელობით მოქმედ სამართალდამცავ სააგენტოებთან კონფიდენციალურობის საკითხებზე.
2024 წელს The New York Times-მა გაავრცელა ინფორმაცია, რომ ავტომწარმოებლები (მათ შორის GM) მომხმარებელთა მართვის ქცევის შესახებ მონაცემებს სადაზღვევო კომპანიებს უზიარებდნენ. Bonta-ს ოფისის განცხადებით, GM-მა მიჰყიდა ასიათასობით კალიფორნიელის პერსონალური მონაცემები, გეოლოკაცია და მართვის ისტორია მონაცემთა ბროკერებს — Verisk Analytics-სა და LexisNexis Risk Solutions-ს. მონაცემები გროვდებოდა OnStar პროგრამის მეშვეობით, რითაც კომპანიამ დაახლოებით $20 მილიონი გამოიმუშავა.
კალიფორნიის მკაცრი კანონმდებლობის გამო, აღნიშნულ ქმედებას დაზღვევის ტარიფების ზრდა არ გამოუწვევია. შეთანხმების ფარგლებში, GM $12.75 მილიონს გადაიხდის სამოქალაქო ჯარიმის სახით და მომდევნო 5 წლის განმავლობაში მსგავსი მონაცემების გაყიდვას შეწყვეტს. კომპანიამ ასევე აიღო 180 დღეში უკვე არსებული მონაცემების წაშლის ვალდებულება.
GM-მა Reuters-თან საუბრისას აღნიშნა, რომ შეთანხმება ფარავს 2024 წელს გაუქმებულ Smart Driver პროდუქტს და ადასტურებს კომპანიის მიზანს, გააძლიეროს კონფიდენციალურობის დაცვის მექანიზმები.
წყარო: techcrunch.com
