ლუის ფონ ანს წლების წინ შეეძლო პენსიაზე გასვლა. Duolingo-ს აღმასრულებელი დირექტორი ფართო საზოგადოებისთვის ცნობილია როგორც CAPTCHA-ს შემქმნელი. 2009 წელს თავისი ქმნილების Google-ისთვის მიყიდვის შემდეგ, ფონ ანმა დრო არ დაკარგა და ახალი კომპანია დააარსა, რომელიც დღეს მსოფლიოში ერთ-ერთი ყველაზე პოპულარული საგანმანათლებლო პლატფორმაა.
ფონ ანის დედამ, რომელიც ექიმი იყო, მთელი თავისი დანაზოგი შვილის კერძო სკოლაში სასწავლებლად დახარჯა. სწორედ განათლების უთანასწორობამ შთააგონა მას Duolingo-ს შექმნა. დღეს პლატფორმას 130 მილიონზე მეტი მომხმარებელი ჰყავს, დაწყებული იმიგრანტებით, დამთავრებული ისეთი ცნობილი ვარსკვლავებით, როგორიც ჯორჯ კლუნია.
AI და განათლების მომავალი
რას ფიქრობთ ხელოვნურ ინტელექტზე (AI) განათლების ჭრილში და რისი გაკეთება არ შეუძლია მას?
ბევრი რამის. ვფიქრობ, ისეთ პროფესიებში, სადაც ადამიანებს შთაგონება სჭირდებათ (მაგალითად, მასწავლებლად), AI ვერასდროს ჩაანაცვლებს ადამიანს. AI-ისგან შთაგონების მიღება საკმაოდ რთულია. თუმცა, Duolingo უკვე აქტიურად იყენებს generative AI-ს საგანმანათლებლო პროცესის გასაუმჯობესებლად.
თუ AI-ს ნებისმიერი ენის სრულყოფილად თარგმნა შეუძლია, რატომ სჭირდებათ ადამიანებს ენების სწავლა?
ენის სწავლის სურვილი არ შემცირებულა. მომხმარებლების უმეტესობა, ვინც ინგლისურის გარდა სხვა ენას სწავლობს, ამას ჰობის მიზნით აკეთებს. კომპიუტერი უკვე დიდი ხანია ადამიანზე უკეთ თამაშობს ჭადრაკს, მაგრამ ადამიანებს მაინც სურთ მისი სწავლა. მეორე მხრივ, ჩვენი მომხმარებლების ნახევარი ინგლისურს სწავლობს — ეს ჰობი არ არის, ეს უკეთესი სამსახურის პოვნის და შემოსავლის გაზრდის პირდაპირი გზაა.
კომპანიის შექმნა და ბიზნეს მოდელი
როგორ ინარჩუნებთ ბალანსს უოლ-სტრიტის მოლოდინებსა და თქვენს მისიას შორის, რომ ჯორჯ კლუნიმ და სირიელმა ლტოლვილმა ერთნაირი ხარისხის განათლება მიიღონ?
ჩვენი მთავარი მისია მსოფლიოში საუკეთესო განათლების შექმნა და მისი საყოველთაოდ ხელმისაწვდომობის უზრუნველყოფაა. ამჟამად 135 მილიონზე მეტი აქტიური მომხმარებელი გვყავს. მომხმარებელთა 10% იხდის სერვისის საფასურს, ხოლო 90% — არა. მდიდრები იხდიან, სხვები კი უფასოდ სარგებლობენ. ეს მოდელი შესანიშნავად მუშაობს და მასშტაბურ ბიზნესს ქმნის.
როგორ შეიცვალა CEO-ს როლი სტარტაპიდან 1000-მდე თანამშრომლის მქონე კომპანიამდე?
როცა კომპანიაში 20-მდე თანამშრომელია, CEO-სთვის საუკეთესო მიდგომა მიკრომენეჯმენტია. თუმცა, ზრდასთან ერთად ეს სტრატეგია აღარ მუშაობს და მართვის სტილის ევოლუციაა საჭირო. პირადად ჩემთვის ყველაზე რთული კონფლიქტების არიდების ჩვევის დაძლევა იყო. პირველი თანამშრომლის გათავისუფლება სამჯერ მომიწია, რადგან იმდენად რბილად ვუთხარი, ვერც კი მიხვდნენ, რომ სამსახურიდან ვუშვებდი.
წყარო: wired.com
