Donut Lab მიზნად ისახავს დაუმტკიცოს სამყაროს, რომ მისი მყარსხეულიანი (solid-state) ბატარეა რეალურია და ამას დამოუკიდებელი ტესტირებებით ცდილობს. დღევანდელი ტესტი ამოწმებს, თუ როგორ უძლებს ბატარეა დაზიანებას. შედეგი: მართალია მან მუხტი ძლივს შეინარჩუნა, მაგრამ ცეცხლი არ გაჩენილა, რასაც კომპანია გამარჯვებად მიიჩნევს.
ექსტრემალური სიცხის წინა ტესტების დროს, ბატარეის გარსმა ვაკუუმური იზოლაცია დაკარგა. ფინეთის სახელმწიფო კვლევითი ცენტრის, VTT-ის მკვლევარებმა შეისწავლეს, შეეძლო თუ არა ელემენტს ამ მაღალი სტრესისა და ტემპერატურის პირობებში მუშაობის გაგრძელება. ტრადიციულ ლითიუმ-იონურ ბატარეებში მსგავსი დაზიანება ხშირად იწვევს ხანძარს. სტარტაპს სურდა შეემოწმებინა, აიცილებდა თუ არა მათი პროდუქტი მსგავს კატასტროფას.
მკვლევარებმა სამი ფაზისგან შემდგარი ტესტირება ჩაატარეს. შედეგად დაფიქსირდა ენერგიის მოცულობის მკვეთრი ვარდნა 24.7-დან 11.2 Ah-მდე, რაც დაახლოებით 55%-იან დანაკარგს წარმოადგენს. ამასთან, ეფექტურობა 89.6%-დან 83%-მდე შემცირდა, ხოლო შეფუთვის სისქე 17%-ით გაიზარდა.
ვაკუუმის დაკარგვამ ცალსახად დააჩქარა ბატარეის დეგრადაცია და მისი გაბერვა გამოიწვია. მიუხედავად ამისა, Donut Lab-ის განცხადებით, ეს იმის დასტურია, რომ მათი ბატარეა თავს არიდებს დაზიანებული ლითიუმ-იონური ელემენტების ყველაზე ცუდ სცენარებს. "არანაირი ტემპერატურული პიკი, არანაირი ხანძრის რისკი. დაზიანების შემთხვევაში ბატარეა უსაფრთხოდ აგრძელებს მუშაობას შემცირებული სიმძლავრით და მომხმარებელს საფრთხეს არ უქმნის", — აცხადებს კომპანია.
თუმცა, სტარტაპს ჯერ არ დაუმტკიცებია ბატარეის გრძელვადიანი მუშაობა მრავალჯერადი დამუხტვა-განმუხტვის ციკლების ქვეშ. Donut ამტკიცებს, რომ მათ solid-state ბატარეას 100,000 ციკლის გაძლება შეუძლია, რაც სტანდარტული EV ბატარეის მაჩვენებელს (1,000-2,000 ციკლი) მნიშვნელოვნად აღემატება. ამასთან, კომპანიას ჯერ არ მოუთხოვია დამოუკიდებელი ვერიფიკაცია ენერგიის სიმკვრივის მაჩვენებელზე (400 Wh/kg), რაც დამატებით კითხვებს აჩენს ტექნოლოგიური საზოგადოების მხრიდან.
წყარო: theverge.com
