მონაცემთა ცენტრების დეველოპერი Crusoe ენერგიის შენახვის შესაძლებლობებს Form Energy-სა და Redwood Energy-სგან ბატარეების შესყიდვით ზრდის.
კომპანიის განცხადებით, ის 12 გიგავატ-საათის მოცულობის Form Energy-ს 100-საათიან ბატარეებს შეიძენს. ეს Form-ისთვის რიგით მეორე დიდი გარიგებაა. გასულ თვეში კომპანიამ Google-ისთვის მინესოტაში 30 გიგავატ-საათიანი ბატარეის აშენების შესახებ განაცხადა, რაც The Information-ის თანახმად, დაახლოებით 1 მილიარდი დოლარის ღირებულების პროექტი იყო.
Form, რომელსაც Crusoe-სთან გარიგების ღირებულება არ გაუმჟღავნებია, ბატარეების მიწოდებას 2027 წლიდან დაიწყებს. მიუხედავად იმისა, რომ ეს Google-ის გარიგებაზე მცირეა, ის Form-ს ასობით მილიონი დოლარის შემოსავალს მოუტანს იმ ფონზე, როცა კომპანია 500 მილიონი დოლარის მოზიდვის ახალ რაუნდს იწყებს. PitchBook-ის მონაცემებით, დღემდე Form-ს ჯამში 1.4 მილიარდი დოლარი აქვს მოზიდული.
Form-ის ინოვაციური რკინა-ჰაერის ბატარეები ეფუძნება ჟანგბადისა და რკინის ურთიერთქმედების პრინციპს — დატენვისა და განმუხტვის პროცესი რკინის დაჟანგვასა და ჟანგისგან გათავისუფლების ხარჯზე გამოყოფს ელექტროენერგიას. მზარდი მოთხოვნის დასაკმაყოფილებლად კომპანიამ დასავლეთ ვირჯინიაში თავისი პირველი ქარხნის გაფართოება ჯერ კიდევ გასულ წელს დაიწყო.
ამასთან ერთად, Crusoe-მ Redwood Materials-თან პარტნიორობის გაფართოების შესახებაც განაცხადა. ბატარეების გადამუშავებისა და ხელახალი გამოყენების ეს კომპანია Tesla-ს ყოფილი CTO-ს, J. B. Straubel-ის მიერ არის დაფუძნებული. Redwood მონაცემთა ცენტრს დამატებით 8 მეგავატი სიმძლავრის, ხელახლა გამოყენებულ EV (ელექტრომობილის) ბატარეებს მიაწვდის.
წყარო: techcrunch.com
