Cognition-ის გენერალურმა დირექტორმა, სკოტ ვუმ, საზოგადოების ყურადღება კიდევ ერთხელ მიიპყრო, როდესაც მისმა ორწლიანმა AI დეველოპერულმა სტარტაპმა 1 მილიარდი დოლარის ინვესტიცია მოიზიდა 26 მილიარდ დოლარიანი შეფასებით. Cognition არის Devin-ის შემქმნელი, რომელიც ერთ-ერთი პირველი და ყველაზე წარმატებული AI პროგრამისტია. ვუს თქმით, Devin-ს შეუძლია „დავალებები თავიდან ბოლომდე, დამოუკიდებლად შეასრულოს“.
თუმცა, ჩაანაცვლებს თუ არა Devin საშუალო დონის (L4) პროგრამისტს? „ჩვენ არასდროს გვიფიქრია ადამიანების ჩანაცვლებაზე. ეს არასდროს ყოფილა ჩვენი ხედვა“, — აცხადებს ვუ. ტექნოლოგიურ სექტორში მიმდინარე მასობრივი შემცირებების ფონზე, ვუს განსაკუთრებით არ სურს, რომ კოდერებმა სამსახური დაკარგონ: „ჩვენ თავად პროგრამისტები ვართ. კოდირება ცხრა წლის ასაკში დავიწყე“.
ვუ, რომელიც ბავშვობაში მათემატიკისა და პროგრამირების ოლიმპიადების ვარსკვლავი იყო, განმარტავს, რომ Devin-ის იდეა ადამიანის დამხმარე „მეგობრის“ შექმნა იყო. მისი აზრით, AI აგენტებმა ადამიანებს პროგრამირებისგან მიღებული სიამოვნება არ უნდა წაართვან. როგორც თავის დროზე ვიზუალურმა დეველოპერულმა გარემომ (IDE) გაამარტივა პროგრამირება, ისე AI აგენტები წარმოადგენენ აბსტრაქციის მორიგ დონეს იდეიდან მზა პროდუქტამდე.
მიუხედავად ამისა, Cognition-ში კოდის 89%-ს სწორედ Devin წერს, ხოლო დანარჩენს — Windsurf-ის ლოკალური აგენტები. ვუ განმარტავს, რომ აგენტის როლი ძირითადად რუტინული და მოსაწყენი სამუშაოების შესრულებაა, როგორიცაა ძველი პროგრამული უზრუნველყოფის განახლება ან პლატფორმების მიგრაცია, რაც პროგრამისტებს შემოქმედებითი პროცესისთვის მეტ დროს მისცემს.
ვუ ვარაუდობს, რომ AI აგენტები სხვა ინდუსტრიებშიც (მაგალითად, მედიცინასა და კლიენტთა მომსახურებაში) შევლენ, თუმცა მიზნად კვლავ ადამიანების გაძლიერება უნდა დარჩეს: „თავიდანვე ნათელი იყო ჩვენთვის — საბოლოო გადაწყვეტილება ყოველთვის ადამიანმა უნდა მიიღოს“.
წყარო: techcrunch.com
