Cloudflare შეუერთდა ტექნოლოგიური კომპანიების (მათ შორის Meta, Microsoft და Amazon) მზარდ სიას, რომლებმაც გაზრდილი შემოსავლების ფონზე მასშტაბური გათავისუფლებების შესახებ განაცხადეს და ორივე ტენდენცია AI-ის გამოყენებას დაუკავშირეს.
Cloudflare-მა 2026 წლის პირველი კვარტლის ანგარიშში აღნიშნა, რომ პერსონალს დაახლოებით 20%-ით (1,100 თანამშრომელი) ამცირებს. კომპანიის თანადამფუძნებლის და CEO-ს, Matthew Prince-ის თქმით, ეს 16-წლიანი ისტორიის განმავლობაში პირველი მასობრივი შემცირებაა, რომელიც შეეხება ყველა გუნდს და გეოგრაფიულ ლოკაციას, გაყიდვების დეპარტამენტის გარდა.
შემცირებების ფონზე, კომპანიამ ისტორიულად რეკორდული კვარტალური შემოსავალი — $639.8 მილიონი დააფიქსირა (34%-იანი წლიური ზრდა). თუმცა, ამავდროულად, ზარალმა $62.0 მილიონი შეადგინა. მიუხედავად ამისა, Cloudflare-ის ე.წ. „დარჩენილი შესრულების ვალდებულებები“ (RPO) $2.5 მილიარდს აჭარბებს.
AI, როგორც მამოძრავებელი ძალა
Prince-მა ხაზგასმით აღნიშნა, რომ 20%-იანი შემცირება ხარჯების ოპტიმიზაციას არ ემსახურება და უშუალოდ AI ტექნოლოგიების დანერგვითაა განპირობებული. მისი თქმით, ბოლო სამ თვეში კომპანიაში AI-ის მოხმარება 600%-ით გაიზარდა. R&D გუნდი აქტიურად იყენებს Workers პლატფორმას და დაწერილი კოდის 100% ახლა ავტონომიური AI აგენტების მიერ მოწმდება.
არა მხოლოდ დეველოპერები, არამედ HR, ფინანსური და მარკეტინგის გუნდები ყოველდღიურად ათასობით AI სესიას იყენებენ სამუშაოს შესასრულებლად. შედეგად, ამ მაღალპროდუქტიულ თანამშრომლებს ნაკლები დამხმარე პერსონალი სჭირდებათ.
მიუხედავად შემცირებებისა, Cloudflare აგრძელებს ტალანტების აყვანას და ვარაუდობს, რომ 2027 წელს უფრო მეტი თანამშრომელი ეყოლება, ვიდრე 2026 წლის ნებისმიერ პერიოდში. შეკითხვაზე, თუ რატომ გახდა საჭირო ასეთი რადიკალური შემცირება წარმატებული კვარტლის შემდეგ, Prince-მა უპასუხა: „მხოლოდ ის, რომ კარგ ფორმაში ხარ, არ ნიშნავს, რომ უკეთეს ფორმაში ვერ იქნები.“
წყარო: techcrunch.com
