ამერიკულმა სამედიცინო მოწყობილობების მწარმოებელმა კომპანიამ Boston Scientific ოფიციალურად დაადასტურა, რომ კიბერშეტევის შედეგად მისი საქმიანობა გლობალური მასშტაბით შეფერხდა. კომპანიამ აშშ-ის ფასიანი ქაღალდებისა და ბირჟების კომისიას (SEC) აცნობა, რომ სამშაბათიდან მოყოლებული, კრიტიკულად მნიშვნელოვან IT სისტემებსა და ბიზნეს აპლიკაციებზე წვდომა შეზღუდულია.
Boston Scientific, რომელიც ისეთი მოწყობილობების წარმოებითაა ცნობილი, როგორიცაა კარდიოსტიმულატორები და დეფიბრილატორები, აცხადებს, რომ ინციდენტმა გავლენა მოახდინა შეკვეთების დამუშავებასა და პროდუქციის მიწოდებაზე. კომპანიის წარმომადგენლებმა ჯერჯერობით არ დააკონკრეტეს, შეეხო თუ არა შეფერხება უშუალოდ პაციენტებს, რომლებსაც მათი სამედიცინო იმპლანტები ესაჭიროებათ.
არსებული ინფორმაციით, ირლანდიაში, კორკის საწარმოო ბაზაზე დასაქმებული ათასობით თანამშრომელი ქსელური კომუნიკაციების გათიშვის გამო სახლში გაუშვეს. კომპანია აცხადებს, რომ გამოძიება მიმდინარეობს, თუმცა სისტემების სრულად აღდგენის ვადები ჯერჯერობით უცნობია.
აღსანიშნავია, რომ ეს ჯანდაცვის ტექნოლოგიების სექტორში კიბერუსაფრთხოების კუთხით არსებული მზარდი საფრთხეების მორიგი მაგალითია. მიმდინარე წელს მსგავსი თავდასხმების სამიზნე გახდნენ ისეთი გიგანტები, როგორებიცაა Abbott Laboratories, Medtronic და Stryker. ექსპერტები აღნიშნავენ, რომ მსგავსი ინციდენტები ხშირად კრიტიკული ინფრასტრუქტურის მოწყვლადობას უსვამს ხაზს.
წყარო: techcrunch.com
