უცნობმა ტექნიკურმა პრობლემამ ჩინური ტექნოლოგიური გიგანტის, Baidu-ს კუთვნილი რობოტაქსების მოძრაობის შეჩერება გამოიწვია, რის გამოც მგზავრები ავტომობილებში საათზე მეტხანს ჩარჩნენ.
უხანში (Wuhan), სადაც კომპანიამ ასობით Apollo Go თვითმართვადი ტაქსი განათავსა, სისტემამ მასშტაბური შეფერხება განიცადა. გავრცელებულ კადრებში ჩანს, რომ მანქანები გადატვირთულ მაგისტრალებზე, ძირითადად სწრაფ ზოლებში გაჩერდნენ. მგზავრების თქმით, მანქანები მოულოდნელად ჩერდებოდნენ, ეკრანზე კი ჩნდებოდა შეტყობინება, რომელიც მათ ადგილზე დარჩენისკენ მოუწოდებდა.
მომხმარებელთა მხარდაჭერის გუნდთან დაკავშირება ფაქტობრივად შეუძლებელი აღმოჩნდა. აპლიკაციაში ინტეგრირებული SOS ღილაკიც არ მუშაობდა, რის გამოც ბევრ მგზავრს კარის ძალის გამოყენებით გაღება და მანქანიდან გადმოსვლა მოუწია. ადგილობრივი პოლიციის განცხადებით, ინციდენტი სისტემური გაუმართაობით იყო გამოწვეული. დაშავებულები არ არიან, თუმცა მოულოდნელად გაჩერებული რობოტაქსების გამო რამდენიმე ავტოსაგზაო შემთხვევა დაფიქსირდა.
Baidu ჩინეთის წამყვანი თვითმართვადი ტექნოლოგიების კომპანიაა. მას რობოტაქსის სერვისები ათზე მეტ ჩინურ ქალაქში აქვს გაშვებული და საერთაშორისო ექსპანსიასაც აქტიურად განაგრძობს. თებერვალში კომპანიამ განაცხადა, რომ სერვისის ფარგლებში 20 მილიონი მგზავრობა უკვე წარმატებით განხორციელდა.
წყარო: wired.com
