სტარტაპი Poke, რომელიც AI აგენტების გამოყენებას ჩვეულებრივი ტექსტური შეტყობინების გაგზავნასავით ამარტივებს, გახდა პირველი AI აგენტი, რომელმაც Apple-ის Messages for Business პლატფორმაზე მუშაობის ავტორიზაცია მიიღო. აქამდე აღნიშნული პლატფორმა მხოლოდ მსხვილი ბიზნესებისთვის (ავიაკომპანიები, სასტუმროები, რითეილერები) იყო განკუთვნილი, რათა მათ მომხმარებლებთან iMessage-ის მეშვეობით დაემყარებინათ კომუნიკაცია. ეს პირველი შემთხვევაა, როდესაც Apple-მა პლატფორმა მესამე მხარის დამოუკიდებელ AI აგენტს გაუხსნა.
Poke, რომელიც მიმდინარე წლის მარტში ჩაეშვა, შექმნილია იმ მომხმარებლებისთვის, რომლებსაც არ აქვთ ტექნიკური უნარები Command-Line ინსტრუმენტებთან ან უფრო რთულ სისტემებთან (მაგალითად, OpenClaw) სამუშაოდ. დღეს Poke-ს შეუძლია დაეხმაროს მომხმარებლებს ყოველდღიურ დაგეგმვაში, კალენდრის მართვაში, ფიტნესის კონტროლსა და ფოტოების რედაქტირებაში — ეს ყველაფერი მარტივი SMS-ით ხორციელდება. კომპანიის ინფორმაციით, სერვისმა უკვე 100 მილიონზე მეტი შეტყობინება დაამუშავა.
Poke-ის დამფუძნებელი, Marvin von Hagen (The Interaction Company) აღნიშნავს, რომ სტარტაპი Apple-ს თითოეულ მომხმარებელზე გადაუხდის საფასურს. მიუხედავად იმისა, რომ ზუსტი ტარიფები კონფიდენციალურია, ეს ფასი მნიშვნელოვნად დაბალია Meta AI-ს ტარიფებთან შედარებით, რომელმაც ევროკავშირის რეგულაციების საპასუხოდ WhatsApp-ზე ფასები გაზარდა. მონეტიზაციის ეს მოდელი Apple-ისთვის ახალ შემოსავალს ნიშნავს, ხოლო AI სტარტაპებისთვის — დისტრიბუციის დამატებით ხარჯს.
Apple-ისგან თანხმობის მისაღებად, სტარტაპს მოუწია დაემტკიცებინა, რომ საჭიროების შემთხვევაში ცოცხალი მხარდაჭერის (live support) გაწევა შეუძლია და რომ მისი ინტერფეისი სრულად შეესაბამება Apple-ის მკაცრ დიზაინერულ სტანდარტებს. პროცესს რამდენიმე თვე დასჭირდა, რაც ხაზს უსვამს ბრენდისა და უსაფრთხოების მიმართ Apple-ის მაღალ მოთხოვნებს.
Spark Capital-ისა და General Catalyst-ის მიერ მხარდაჭერილმა 10-კაციანმა სტარტაპმა ახლახან $10 მილიონის დამატებითი დაფინანსება მოიზიდა, რითაც მისი პოსტ-ინვესტიციის შეფასება (post-money valuation) $300 მილიონამდე გაიზარდა.
წყარო: techcrunch.com
