Apollo Global Management-ის მთავარი ეკონომისტის, ტორსტენ სლოკის განცხადებით, ხელოვნური ინტელექტი (AI) ტექნოლოგიური სექტორის გარეთ მოქმედი მსხვილი კორპორაციების ფინანსურ მაჩვენებლებზე ჯერჯერობით არ აისახება.
სლოკი ყურადღებას ამახვილებს ე.წ. S&P 493-ზე, რაც გულისხმობს S&P 500-ის ინდექსს ტექნოლოგიური გიგანტების (Alphabet, Amazon, Apple, Meta, Microsoft, Nvidia და Tesla) გარეშე. კვლევის თანახმად, ამ კომპანიებში მოგების მარჟა და დასაქმებულზე გათვლილი შემოსავალი სტაბილურია, რაც მიუთითებს იმაზე, რომ AI-ს პროდუქტიულობის ზრდაზე ხელშესახები გავლენა არ მოუხდენია.
„მიუხედავად მასშტაბური ინვესტიციებისა და ხელოვნური ინტელექტის გარშემო არსებული აჟიოტაჟისა, ტექნოლოგიამ ამერიკულ კორპორაციებს ტექნოლოგიური სექტორის მიღმა ნულოვანი ფინანსური სარგებელი მოუტანა“, - აღნიშნავს სლოკი.
ეკონომისტი სკეპტიკურად უყურებს იმ მოსაზრებას, რომ არატექნოლოგიური კომპანიები უბრალოდ ჩამორჩებიან ტენდენციებს. მისი თქმით, ბიზნესისთვის რთული იქნება იაფი ინტელექტის შემოსავლის ზრდად და მოგების მარჟად გარდაქმნა. სლოკი ხაზს უსვამს, რომ ბიზნესში ინტელექტი ძირითადად განსჯის უნარს გულისხმობს, ხოლო AI-ს არ ესმის პასუხისმგებლობა, ნდობა, კორპორატიული კულტურა, ეთიკური კომპრომისები და სამართლიანობა, რაც რეპუტაციულ რისკებსა და საბოლოო ფინანსურ შედეგებს განსაზღვრავს.
აღსანიშნავია, რომ ბოლო პერიოდის სხვა კვლევებიც ადასტურებს, რომ ხელოვნურ ინტელექტს პროდუქტიულობის მნიშვნელოვანი ზრდა ჯერ არ მოუტანია.
წყარო: techcrunch.com
