Airbnb-ის გენერალურ დირექტორს, ბრაიან ჩესკის, აღარ აკმაყოფილებს მხოლოდ ხელოვნური ინტელექტის მხარდამჭერის როლი — ის საკუთარი AI ლაბორატორიის დაარსებას გეგმავს. Bloomberg-ის მიერ გავრცელებული და TechCrunch-ის მიერ დადასტურებული ინფორმაციით, ჩესკი უერთდება სილიკონის ველის იმ ლიდერებს, რომლებიც უკმაყოფილოები არიან ბაზარზე არსებული წამყვანი მოდელებით.
მიუხედავად იმისა, რომ Airbnb აქტიურად იყენებს AI კოდირების ინსტრუმენტებს, კომპანიას ჯერ კიდევ არ გაუფორმებია პარტნიორობა არცერთ LLM-პროვაიდერთან, რადგან ჩესკის მიაჩნია, რომ არსებული პროდუქტები ჯერ კიდევ დასახვეწია. ჩესკის მჭიდრო კავშირი აქვს ინდუსტრიასთან — იგი Sam Altman-ს ჯერ კიდევ 2006 წლიდან, Y Combinator-ის პერიოდიდან იცნობს და OpenAI-ის კრიზისის დროს ალტმანის მწვრთნელისა და მრჩევლის როლსაც ასრულებდა.
ამჟამად უცნობია, თუ რა იქნება ჩესკის ახალი AI ლაბორატორიის მთავარი ფოკუსი, თუმცა ვარაუდობენ, რომ აქცენტი მომხმარებლის ინტერფეისსა (UI) და დიზაინზე გაკეთდება — მიმართულებებზე, რომლებსაც ის Airbnb-ში ყოველთვის პრიორიტეტს ანიჭებდა. ეს მიდგომა ჰგავს Brett Adcock-ის მიერ ახლახან დაარსებულ Hark ლაბორატორიას, რომელიც AI ასისტენტებისთვის ახალ ინტერფეისებს ქმნის.
აღსანიშნავია, რომ ჩესკი არ აპირებს „დამფუძნებლის რეჟიმში“ (founder mode) გადასვლას. ის შეინარჩუნებს Airbnb-ის აღმასრულებელი დირექტორის პოსტს და ახალ ლაბორატორიას პირადად არ უხელმძღვანელებს. ვინც ამ პოზიციას დაიკავებს, მოუწევს არა მხოლოდ კონკურენტებთან ბრძოლა, არამედ მიკრომენეჯმენტით ცნობილ დამფუძნებელთან თანამშრომლობაც.
წყარო: techcrunch.com
