ფენიქსში, არიზონას შტატში ბაზირებულმა კომპანიამ Lectric eBikes, რომელიც ცნობილია თავისი პრაქტიკული და ხელმისაწვდომი XP სერიის ელექტროველოსიპედებით, წელს სამი ახალი ბრენდი ჩაუშვა: რეორგანიზებული Juiced Bikes, ახალი Juiced Powersports და პრემიუმ სათავგადასავლო ბრენდი Monarc. ეს გაფართოების სტრატეგია სრულიად ეწინააღმდეგება სექტორში არსებულ გაკოტრების ტალღას.
Lectric-მა ამ ინიციატივებში დაახლოებით 10 მილიონი დოლარის ინვესტიცია ჩადო, განუცხადა TechCrunch-ს კომპანიის გენერალურმა დირექტორმა, ლევი კონლოუმ. „სხვები შეიძლება უკან იხევენ ან დამატებით ფულს ეძებენ, ჩვენ კი რეალურად ვაფართოებთ ინვესტიციებს,“ - აღნიშნა მან.
ბოლო ორ წელიწადში არაერთი e-bike კომპანია გაკოტრდა ან დაიხურა, მათ შორის Rad Power Bikes, რომელმაც 330 მილიონ დოლარამდე ვენჩურული კაპიტალი (venture capital) მოიზიდა და ერთ დროს 1.65 მილიარდ დოლარად ფასდებოდა. თუმცა, კონლოუს აზრით, ამან ბაზარი გაათავისუფლა და კონკურენცია შეამცირა.
Lectric-ის დამფუძნებლებს არასდროს მოუზიდავთ ვენჩურული დაფინანსება. მათ ბიზნესი საკუთარი სახსრებით (bootstrapping) დაიწყეს და მხოლოდ 2020 წელს მიიღეს ინვესტიცია კერძო კაპიტალის (private equity) ფირმა Bertram Capital Management-ისგან. დღეს ის აშშ-ში პირდაპირი გაყიდვების ერთ-ერთი უმსხვილესი e-bike კომპანიაა, რომელიც 2025 წელს 150,000 ერთეულის მიწოდებას გეგმავს.
კომპანიის სტრატეგიაა — განვითარდე საკუთარი სახსრებით, შეინარჩუნო მომგებიანობა, დაელოდო უკეთ დაფინანსებული კონკურენტების კოლაფსს და შემდეგ გაფართოვდე. თუმცა, კონლოუ ფრთხილობს: „Lectric ვერ იქნება ყველაფერი ყველასთვის“. ბრენდის გაუფასურების თავიდან ასაცილებლად, ახალი მიმართულებები ცალკეულ ბრენდებად ყალიბდება.
ყველა ახალ ბრენდს (Juiced Bikes, Juiced Powersports, Monarc) საკუთარი საინჟინრო, მარკეტინგული და მომხმარებელთა მხარდაჭერის გუნდები ჰყავს. ისინი დამოუკიდებლად ოპერირებენ, თუმცა იყენებენ Lectric-ის მიწოდების ჯაჭვსა და რესურსებს. საინტერესოა, რომ არცერთი ბრენდი მომხმარებელთა მხარდაჭერისთვის AI-ს გამოყენებას არ გეგმავს და აქცენტს რეალურ ადამიანებთან კომუნიკაციაზე აკეთებს.
წყარო: techcrunch.com
