ირანის ისლამური რევოლუციის გუშაგთა კორპუსმა (IRGC) სამშაბათს გააფრთხილა, რომ ოთხშაბათიდან ახლო აღმოსავლეთში მოქმედი ათზე მეტი ამერიკული კომპანიის წინააღმდეგ თავდასხმების დაწყებას გეგმავს. ეს ნაბიჯი აშშ-სა და ისრაელთან მიმდინარე ომში ირანის მოქალაქეების დაღუპვის საპასუხოდ არის მიმართული. სამიზნეთა სიაში მოხვდნენ ისეთი გიგანტები, როგორიცაა Apple, Google, IBM, Intel, Microsoft, Tesla და Boeing, რომლებსაც IRGC ამერიკული სამხედრო ოპერაციების ხელშეწყობაში ადანაშაულებს. IRGC ამერიკული ფირმების თანამშრომლებს ევაკუაციისკენ, ხოლო მშვიდობიან მოქალაქეებს ამ ობიექტებისგან შორს ყოფნისკენ მოუწოდებს.
სამშაბათს Telegram-ზე გამოქვეყნებული მუქარა აგრძელებს ამერიკული კომერციული ინფრასტრუქტურის წინააღმდეგ ირანის კამპანიას მას შემდეგ, რაც აშშ-მა და ისრაელმა 28 თებერვალს თეირანზე პირველი იერიში მიიტანეს. 1 მარტს ირანულმა დრონებმა არაბთა გაერთიანებულ საამიროებსა და ბაჰრეინში Amazon Web Services-ის სამ მონაცემთა ცენტრს დაარტყეს, რაც ამერიკული hyperscale cloud ინფრასტრუქტურაზე პირველი საჯაროდ დადასტურებული თავდასხმა იყო.
მიმდინარე თვის დასაწყისში IRGC-სთან დაკავშირებულმა სააგენტო Tasnim-მა გამოაქვეყნა 29 რეგიონალური ოფისისა და მონაცემთა ცენტრის სია, რომლებსაც მართავენ Amazon, Google, IBM, Nvidia და Palantir. მათ აშშ-ის სამხედრო და სადაზვერვო საქმიანობის მხარდაჭერაში ადანაშაულებენ.
Telegram-ის პოსტის თანახმად, თავდასხმები 1 აპრილს, თეირანის დროით საღამოს 8 საათის შემდეგ დაიწყება. მოთხოვნის მიუხედავად, კომპანიების უმეტესობამ კომენტარისგან თავი შეიკავა.
სპარსეთის ყურეში ამერიკული ტექნოლოგიური ინფრასტრუქტურა მილიარდობით დოლარადაა შეფასებული, რადგან ტექნოლოგიური გიგანტები რეგიონს AI განვითარების მომავალ ჰაბად მოიაზრებენ. თუმცა, IRGC ამ სამოქალაქო პროვაიდერებს "ლეგიტიმურ სამიზნეებად" მიიჩნევს იმ ტექნოლოგიების მიწოდებისთვის, რომლებმაც აშშ-ისრაელის ერთობლივი თავდასხმები გახადა შესაძლებელი. მაგალითად, Palantir ქმნის მონაცემთა არქიტექტურას პენტაგონის AI პროგრამისთვის Project Maven, რომელიც საჰაერო დარტყმების სამიზნეების დასადგენად გამოიყენება.
ამერიკელმა სამხედროებმა საპასუხოდ IRGC-ის დრონების ქსელები დაბომბეს. მიუხედავად იმისა, რომ ბოლო დღეებში საჰაერო კამპანია შენელდა სამშვიდობო მოლაპარაკებების შესაძლებლობის გამო, პენტაგონი განიხილავს ახლო აღმოსავლეთში დამატებით 10,000 ჯარისკაცის განლაგებას შესაძლო სახმელეთო ოპერაციის წინ. კონფლიქტის დაწყებიდან დაიღუპა დაახლოებით 2,000 ირანელი და სულ მცირე 13 ამერიკელი სამხედრო. ჰორმუზის სრუტე, რომელიც მნიშვნელოვანი სავაჭრო მარშრუტია, ირანის მუქარის გამო კვირებია ჩაკეტილია.
წყარო: wired.com
