დეკრეტული შვებულებიდან სამსახურში დაბრუნებულ დეველოპერ ქალებს სრულიად ახალი რეალობა დახვდათ. სულ რაღაც ერთ წელიწადში, AI ინსტრუმენტებმა პროგრამული უზრუნველყოფის შექმნის პროცესი რადიკალურად შეცვალეს. თუ ადრე კოდის წერა უშუალო შემოქმედებითი პროცესი იყო, დღეს ის უფრო მეტად AI-ს მიერ გენერირებული მასალის ზედამხედველობად იქცა.
ტექნოლოგიური გიგანტების ლიდერები, მათ შორის Mark Zuckerberg (Meta) და Sam Altman (OpenAI), პროგნოზირებენ, რომ ახლო მომავალში კოდის უდიდეს ნაწილს სწორედ ხელოვნური ინტელექტი დაწერს. თუმცა, ტემპი იმდენად სწრაფია, რომ დეკრეტში მყოფი ქალები, რომლებიც დროებით მოწყვეტილნი იყვნენ სამუშაო პროცესს, კოლეგებთან შედარებით არათანაბარ პირობებში აღმოჩნდნენ.
ამერიკელი მონაცემთა ინჟინერი Mary McCreary აღნიშნავს, რომ AI-მ გააადვილა სხვისი კოდის გარჩევა, თუმცა სამუშაოდან გააქრო მარტივი, რუტინული ეტაპები, რაც გონებრივ განტვირთვას ემსახურებოდა. სხვა დეველოპერები კი აღნიშნავენ, რომ კომპანიებმა დაიწყეს რეიტინგების წარმოება იმის მიხედვით, თუ რამდენად აქტიურად იყენებენ თანამშრომლები AI-ს მუშაობაში.
ახალი ტექნოლოგიების, მათ შორის Anthropic-ის Claude Opus 4.5-ის გამოჩენამ, პროდუქტიულობა საგრძნობლად გაზარდა, რამაც ბევრს სამუშაო ადგილის დაკარგვის შიში გაუჩინა. ქალები, რომლებიც დეკრეტის შემდეგ ახალ სამსახურს ეძებენ, აწყდებიან მოთხოვნებს AI-ის ფლობაზე, სადაც დამსაქმებლები ხშირად თავადაც ვერ აყალიბებენ ზუსტ მოთხოვნებს.
ამ კრიტიკულმა ცვლილებებმა ბევრ პროფესიონალს კარიერული გზის გადაფასება აიძულა. ზოგიერთი მათგანი სფეროს სრულად შეცვლასაც კი განიხილავს, რადგან არ სურთ საკუთარი დრო მხოლოდ AI-ის მიერ დაშვებული შეცდომების გამოსწორებას დაუთმონ.
წყარო: wired.com
