ხელოვნური ინტელექტი (AI) სულ უფრო ძვირი ჯდება, რის გამოც ზოგიერთი კომპანია ხარჯების ოპტიმიზაციის მიზნით მისი გამოყენების შეზღუდვას იწყებს. მათ შორისაა ტექნოლოგიური გიგანტი Uber, რომელმაც ახლახან AI-ს გადამეტებული ხარჯების შესამცირებლად შიდა ლიმიტები დააწესა.
Bloomberg-ის ინფორმაციით, კომპანიამ შემოიღო ახალი წესი, რომელიც თითოეულ თანამშრომელზე და თითოეულ AI კოდირების ხელსაწყოზე (როგორიცაა Anthropic-ის Claude Code ან Cursor) თვიურ ლიმიტად 1500 აშშ დოლარს ადგენს. მოხმარების მონიტორინგი სპეციალური შიდა პანელის მეშვეობით ხდება, თუმცა განსაკუთრებულ შემთხვევებში, შესაბამისი ნებართვით, ლიმიტის გადაჭარბება მაინც შესაძლებელია.
ეს გადაწყვეტილება მოულოდნელი არ ყოფილა. მიმდინარე წლის აპრილში Uber-ის ტექნოლოგიურმა დირექტორმა (CTO) განაცხადა, რომ კომპანიამ ხელოვნური ინტელექტის მთელი წლიური ბიუჯეტი სულ რაღაც ოთხ თვეში სრულად აითვისა. ეს მას შემდეგ მოხდა, რაც მენეჯმენტმა თანამშრომლებს მოუწოდა მაქსიმალურად გამოეყენებინათ AI და შიდა რეიტინგებშიც კი აჯიბრებდა მათ.
ამასთან, კომპანიის საოპერაციო დირექტორმა (COO), Andrew Macdonald-მა, ეჭვქვეშ დააყენა AI-ის რეალური გავლენა პროდუქტიულობაზე და აღნიშნა, რომ რთულია პირდაპირი კავშირის დანახვა ხელოვნური ინტელექტის გამოყენებასა და მომხმარებლისთვის ახალი ფუნქციების შექმნას შორის.
Uber-ის ეს ნაბიჯი ხაზს უსვამს გლობალურ გამოწვევას: მიუხედავად იმისა, რომ ბიზნესი მილიარდობით დოლარის ინვესტიციას ასხამს AI ტექნოლოგიებში, ინვესტიციის უკუგება (ROI) ჯერ კიდევ თეორიულ დონეზე რჩება, რაც ბევრ კომპანიას მოთმინების ფიალას უფსებს.
წყარო: techcrunch.com
