მიუხედავად იმისა, რომ TikTok-ს ძირითადად სოციალურ მედიად მოიხსენიებენ, პლატფორმა დიდი ხანია გასცდა ამ ჩარჩოებს. TikTok Shop-ის, ლოკალური ძიების, რუკების, თამაშებისა და სასტუმროების დაჯავშნის ფუნქციონალის დამატებით, კომპანია აქტიურად ისწრაფვის „სუპერ აპლიკაციად“ (super app) ტრანსფორმაციისკენ, სადაც მომხმარებელი თითქმის ყველა ციფრულ საჭიროებას ერთ სივრცეში დაიკმაყოფილებს.
სასტუმროების დაჯავშნა და მოგზაურობა
TikTok-მა აშშ-ში ჩაუშვა TikTok GO, რომელიც მომხმარებლებს საშუალებას აძლევს აღმოაჩინონ და პირდაპირ აპლიკაციაში დაჯავშნონ სასტუმროები, ატრაქციონები და ტურისტული აქტივობები. ნაცვლად იმისა, რომ ვირუსული ვიდეოს ნახვის შემდეგ მომხმარებელმა მესამე მხარის საიტებზე გადაინაცვლოს, TikTok ხდება ერთი ფანჯრის პრინციპის პლატფორმა, რაც პირდაპირ კონკურენციაში შედის Google Search-სა და Google Maps-თან.
ფინანსური სერვისები და TikTok Shop
კომპანიამ ბრაზილიის ცენტრალურ ბანკს მიმართა ლიცენზიისთვის, რათა იმოქმედოს როგორც fintech კომპანიამ, შესთავაზოს მომხმარებლებს საგადახდო ანგარიშები და პირდაპირი დაკრედიტების სერვისები. ფინანსური ეკოსისტემის შექმნა კიდევ უფრო გააძლიერებს TikTok Shop-ს, რომელმაც აშშ-ში უდიდეს წარმატებას მიაღწია: 2025 წლისთვის მისმა გაყიდვებმა $15.82 მილიარდს მიაღწია, რაც ამერიკული სოციალური კომერციის (social commerce) თითქმის მეოთხედს შეადგენს. TikTok Shop ახლახან ლუქს სეგმენტშიც გაფართოვდა.
მუსიკა, ძიება და გეიმინგი
თუ ადრე TikTok Music-ის სტრიმინგ სერვისის შექმნის მცდელობა წარუმატებლად დასრულდა, დღეს პლატფორმა Spotify-სა და Apple Music-თან პარტნიორობით მუშაობს. ძიების, ლოკალური რუკებისა და მიმოხილვების ინტეგრაციით, მომხმარებლებს აღარ სჭირდებათ Google-ის გამოყენება რესტორნების სამუშაო საათებისა თუ რეიტინგების დასადგენად. გარდა ამისა, პლატფორმა მომხმარებელთა ჩართულობის გასაზრდელად ნერგავს მინითამაშებსა და მოკლე ფორმატის სერიალებს (microdramas), რითაც კონკურენციას უწევს Netflix-საც კი.
აშკარაა, რომ TikTok-ის სტრატეგია მიზნად ისახავს ჩინური WeChat-ის მსგავსი მოდელის შექმნას დასავლურ ბაზარზე, სადაც გართობა, კომერცია, მოგზაურობა და ფინანსები ერთიან ციფრულ სივრცეში თავსდება.
წყარო: techcrunch.com
