American Airlines-მა განაცხადა, რომ მომავალი წლის დასაწყისიდან Starlink-ის სისტემას 500-ზე მეტ ვიწროფუზელაჟიან Airbus-ის თვითმფრინავში დაამონტაჟებს. ეს არის კიდევ ერთი მსხვილი ავიაკომპანია, რომელმაც ფრენის დროს Wi-Fi კავშირის უზრუნველსაყოფად SpaceX-ის შვილობილი ბრენდი აირჩია.
ეს შეთანხმება Starlink-ისთვის — რომელიც წარმოადგენს თანამგზავრული კავშირგაბმულობის ქსელს და SpaceX-ის ერთადერთ სტაბილურად შემოსავლიან ბიზნეს-ერთეულს — მხოლოდ ფინანსურ სარგებელს არ ნიშნავს. ეს არის უმნიშვნელოვანესი გამარჯვება ისეთ კონკურენტებზე, როგორიცაა Amazon LEO და ტრადიციული პროვაიდერი Viasat.
Starlink-ის თანამგზავრები დედამიწის დაბალ ორბიტას იყენებენ მაღალსიჩქარიანი ინტერნეტის მისაწოდებლად როგორც ფიზიკური პირებისთვის, ისე კორპორატიული კლიენტებისთვის. კომპანია წარმატებით აგრძელებს ავიახაზებისა და საკრუიზო ოპერატორების ბაზრის ათვისებას. SpaceX-ის IPO-ს სარეგისტრაციო განაცხადის მიხედვით, Starlink-ის სერვისით უკვე სარგებლობენ United Airlines, Southwest Airlines, Qatar Airways, Lufthansa Group, British Airways და Alaska Airlines.
თუმცა, American Airlines-ის ყველა ხომალდი როდი მიიღებს აღნიშნულ განახლებას. Starlink დამონტაჟდება ახალ Airbus A321XLR და A320neo მოდელებზე, ხოლო Boeing-ის თვითმფრინავები ამ შეთანხმების მიღმა დარჩა.
მიუხედავად ამისა, ეს გარიგება დამატებითი იმპულსია SpaceX-ისთვის მომავალ თვეში დაგეგმილი, ისტორიაში ყველაზე მსხვილად პროგნოზირებული IPO-ს წინ.
წყარო: techcrunch.com
