ჰოლივუდურ სტუდიასა და ტექნოლოგიურ გიგანტს შორის ახალი სტრატეგიული ალიანსი ჩამოყალიბდა. Google DeepMind-მა 75 მილიონი დოლარის ინვესტიცია განახორციელა დამოუკიდებელ კინოსტუდია A24-ში, რომელიც ცნობილია ისეთი ჰიტებით, როგორებიცაა „Everything Everywhere All At Once“ და „Marty Supreme“.
Google DeepMind ამ თანამშრომლობას უნიკალურ პარტნიორობად აფასებს, რომლის ფარგლებშიც კომპანიები კინოწარმოებისთვის სპეციალიზებულ AI ინსტრუმენტებს შექმნიან. პროცესში Google DeepMind წამყვანი არტისტებისგან მიიღებს უკუკავშირს, რაც ტექნოლოგიის შემოქმედებით პროცესთან ადაპტირებას შეუწყობს ხელს.
„ჩვენ გვჯერა, რომ არტისტების გასაძლიერებლად საუკეთესო გზა მათთან უშუალო თანამშრომლობაა“, — განაცხადა Google DeepMind-ის თანადამფუძნებელმა და აღმასრულებელმა დირექტორმა დემის ჰასაბისმა. „A24-თან ერთად ჩვენ შევქმნით AI ფუნქციებს, რომლებიც ხელოვანებს საკუთარი შემოქმედებითი ხედვის რეალიზებაში დაეხმარება“.
მიუხედავად იმისა, რომ ჰოლივუდში AI-ის გამოყენებასთან დაკავშირებით აზრთა სხვადასხვაობა არსებობს, A24 არ არის პირველი სტუდია, რომელიც ამ მიმართულებით აქტიურობს. Netflix-მა ცოტა ხნის წინ შეიძინა ბენ აფლეკის კომპანია InterPositive, რომელიც კინემატოგრაფისტებისთვის AI ინსტრუმენტებს ავითარებს, ხოლო Amazon-ის MGM Studios-მა გასულ წელს დააფუძნა სპეციალური AI განყოფილება სატელევიზიო და კინოწარმოების ოპტიმიზაციისთვის.
წყარო: techcrunch.com
