General Motors-მა დეტროიტის მახლობლად, Warren Tech Center-ის ტერიტორიაზე, ახალი Battery Cell Development Center (BCDC) გახსნა. ეს 500 000 კვადრატული ფუტის ფართობის ობიექტი კომპანიის 900 მილიონი დოლარის ღირებულების სტრატეგიის ქვაკუთხედია, რომელიც მიზნად ისახავს ელექტრომობილების (EV) წარმოების ხარჯების 10%-ით შემცირებას.
GM-ის ბატარეების მიმართულების ვიცე-პრეზიდენტის, კურტ კელტის თქმით, კომპანიის მთავარი იმედი ახალი ქიმიური შემადგენლობის ბატარეა — LMR (lithium-manganese-rich) არის. ეს ტექნოლოგია NMC-ის (ნიკელ-მანგანუმ-კობალტი) მსგავსი ენერგოეფექტურობით გამოირჩევა, თუმცა მისი ღირებულება გაცილებით დაბალია, რაც საშუალებას მისცემს GM-ს, ელექტრომობილების ფასი ტრადიციულ, შიგაწვის ძრავიან ავტომობილებს გაუთანაბროს.
BCDC-ის მთავარი ფუნქცია კვლევითი ლაბორატორიიდან მიღებული ინოვაციების მასშტაბურ წარმოებაზე გადატანაა. ობიექტი დღეში 2500-მდე ბატარეის უჯრედის წარმოებას შეძლებს, რაც საშუალებას იძლევა, ახალი ტექნოლოგიები ბაზარზე დაგეგმილზე ერთი წლით ადრე გამოვიდეს. პროცესის დასაჩქარებლად GM აქტიურად იყენებს ხელოვნურ ინტელექტს (AI) და ფიზიკაზე დაფუძნებულ სიმულაციებს. კომპანიამ უკვე დახარჯა 150 მილიონზე მეტი CPU საათი LMR-ის ტესტირებისთვის და შექმნა ქარხნის სრული „ციფრული ტყუპი“ (digital twin), რამაც დებაგინგისა და წარმოების დაწყების დრო მნიშვნელოვნად შეამცირა.
მიუხედავად აშშ-ის ბაზარზე არსებული გამოწვევებისა, GM მიზნად ისახავს, 2028 წლისთვის LMR-ბატარეებზე მომუშავე ავტომობილები სერიულ წარმოებაში ჩაუშვას. BCDC-ის წარმატება გადამწყვეტი იქნება იმისთვის, რომ კომპანიამ შეინარჩუნოს კონკურენტუნარიანობა ისეთ გლობალურ მოთამაშეებთან, როგორებიც არიან BYD და CATL.
წყარო: techcrunch.com
