Anthropic-მა და ილონ მასკის SpaceX-მა ოთხშაბათს განაცხადეს, რომ გააფორმეს შეთანხმება, რომლის მიხედვითაც Anthropic-ი გამოიყენებს xAI-ის გამოთვლით რესურსებს მემფისის (ტენესი) მონაცემთა ცენტრიდან. ინდუსტრიაში, სადაც კომპლექსური AI პროგრამების გასაშვებად საკმარისი გამოთვლითი სიმძლავრეების ძიება აქტიურად მიმდინარეობს, ეს უახლესი პარტნიორობაა. აღსანიშნავია, რომ მიმდინარე წლის დასაწყისში SpaceX და xAI ერთ კომპანიად გაერთიანდნენ სახელწოდებით SpaceXAI.
Anthropic-ის ხელმძღვანელებმა ამის შესახებ სან-ფრანცისკოში გამართულ დეველოპერთა ყოველწლიურ კონფერენციაზე განაცხადეს. შეთანხმების თანახმად, Anthropic-ი ენერგიასა და გამოთვლით რესურსებს xAI-ის Colossus 1 სუპერკომპიუტერიდან მიიღებს.
IPO და ორბიტალური AI
პარტნიორობა გადამწყვეტ დროს დაემთხვა SpaceXAI-სთვის, რომელიც მომავალ თვეში IPO-ს (აქციების პირველადი განთავსება) გეგმავს. წამყვან AI ლაბორატორიასთან ურთიერთობა გაზრდის SpaceX-ის სანდოობას ინვესტორების თვალში, განსაკუთრებით მაშინ, როცა საუბარია "ორბიტალური AI გამოთვლითი სიმძლავრეების" - ფაქტობრივად, კოსმოსში მონაცემთა ცენტრების განვითარების პოტენციალზე. Anthropic-ის სახით ძლიერი პოტენციური მომხმარებლის არსებობა SpaceXAI-ს დაეხმარება დაარწმუნოს ინვესტორები მისი სუპერ ძვირადღირებული სუპერკომპიუტერული პროექტების მომგებიანობაში.
ილონ მასკის პოზიციის ცვლილება
მიუხედავად იმისა, რომ ილონ მასკი ადრე X-ზე (ყოფილი Twitter) Anthropic-ის AI მოდელებს მკაცრად აკრიტიკებდა და მათ პოლიტიკას მიზანთროპიულსაც კი უწოდებდა, ახლა მისი პოზიცია რადიკალურად შეიცვალა. მან აღნიშნა, რომ გასულ კვირას მნიშვნელოვანი დრო გაატარა Anthropic-ის გუნდთან და შთაბეჭდილების ქვეშ დარჩა იმით, თუ როგორ ცდილობენ ისინი Claude მოდელის კაცობრიობის საკეთილდღეოდ განვითარებას.
Colossus 1 და ტექნიკური მახასიათებლები
SpaceXAI-ის Colossus 1 მსოფლიოში ერთ-ერთი უდიდესი და უსწრაფესი AI სუპერკომპიუტერია. ის აერთიანებს დაახლოებით 220,000 Nvidia GPU-ს, H100 და H200 მოდელებიდან დაწყებული უახლესი GB200 ჩიპებით დამთავრებული. აღნიშნული რესურსები პირდაპირ მოხმარდება Claude Pro და Claude Max მომხმარებლებისთვის სიმძლავრის გაზრდას და ბოლო თვეებში გახშირებული სერვისის შეფერხებების აღმოფხვრას.
გარდა SpaceXAI-სთან შეთანხმებისა, Anthropic-ი აქტიურად აფართოებს თავის Cloud პარტნიორობებსაც. ცოტა ხნის წინ ცნობილი გახდა, რომ კომპანიამ $200 მილიარდის ინვესტირება დაადასტურა Google-ის AI cloud სერვისებსა და TPU ჩიპებში, ხოლო გასულ თვეს განაცხადა, რომ მომდევნო 10 წლის განმავლობაში $100 მილიარდზე მეტს Amazon-ის ტექნოლოგიებში დააბანდებს.
წყარო: wired.com
